Lospalos (18/09): Governu liu husi Sekretariu Estadu Floresta, kompromete ona iha fulan dezembru no Janeiru 2025, sei fahe viveirus (Ai-oan) hamutuk rihun 62 ba komunidade Munisipiu Lautém hodi bele kuda iha ida-idak nia plantasaun.
Sekretariu Estadu Floresta Fernandinho Vieira, hatete, ekipa servisu sira iha sentru viveirus tolu hanesan, Sentru Viveirus Permante iha Pato Lospalos, Laivai Lautem no iha Luro sira prepara ona to’o nia tempu bele fahe ba komunidade sira ne’ebe iha interese atu kuda iha ida-idak nia fatin.
“Ha’u mai vizita Sentru Viveirus sira ne’ebe estabelese iha Lautem atu haree diretamente progresu viveirus ne’ebe tekniku sira prepara ona, nune’e iha fulan-dezembru to’o janeiru 2025 ita bele fahe ba komunidade sira iha teritoriu Timor liu-liu Munisipiu Lautem,” dehan, governante ne’e hafoin vizita Sentru Viveirus Permanente, iha Pato Lospalos.
Fernandinho informa, viveirus ne’ebe atu fahe ne’e parte Sentru Viveiru Permanente iha Pato Lospalos, sei prepara viveirus hamutuk rihun 35, Sentru Viveirus Lavai hamutuk rihun 12, no Sentru Viveirus iha Postu Luro hamutuk rihun 15, dadaun ne’e preparadu hein to’o nia tempu bele halo distribuisaun.
Iha fatin hanesan Ofisial Servisu Viveirus Permanente Nasionál, Amaro dos Reis, refosa, dadaun ne’e ekipa servisu preparau ona ai-oan ho espesie hamutuk hitu (7), mak hanesan, Rambutan, Gaharu, Aidila, Ai-kameli, Ai-kase, Ai-besi no Marungi.
“Dadaun ne’e viveirus hamutuk espesie hitu mak preparadu ona, ami garante tamba kada tinan to’o ona iha fulan-dezembru no janeiru sempre distribui ai-oan ba komunidade sira,” dehan ofisial ne’e.
Enkuantu ai-oan sira seluk ne’ebe ekipa tekniku sira kontinua prepara hodi distribui mak hanesan, Ai-teka, Mahoni, Saria, Kiar, Ai-kakeu, Hali, Tenbesi, Gamal, Kasih, Tebaboia, Kamblo, Nimba, Haas, Apokate, Kulu, Petaiciña no seluk tan.
Reportazen: Veru.
Editor: Malay Lada
