LOSPALOS – Lautem Post, 27/11/2023_ Sentru Formasaun Komuputador no Kostura Madre Salejiana Fuiloru fo sertifikadu ba Graduandu sira hamutuk ema nain 49 ne’ebe durante ne’e tuir hela formasaun iha Sentru ne’e.
Formasaun ne’e hahu durante tinan ida nia laran ho materia mak aprende konaba administrasaun Jeral, Rekursu Umanu, atendimentu kliente, Komunikasaun no Ekonomia, inklui estagio durante fulan tolu nia laran.
Tuir Graduada Fidelia Ximenes Sente kontente tamba bele atinji ona nia hakarak hodi bele fo kontente ba nia familia.
Nia rasik mos sei aplika buat ne’ebe nia hetan iha terenu hodi transmite fali ba nia kolega sira ne’ebe presiza.
“hau sente kontente tebes tamba hau bele atingi buat nebe maka hau hakarak no hau sei aplika iha fatin nebe ami ba, no mos hanorin fali kolega sira nebe seidauk aprende.” Hateten ba Lautem Post, foin lalais ne’e. segunda, (27/11)
Nia dehan materia ne’ebe durante ne’e sira aprende iha fatin formasaun mak konaba administrasaun jeral ne’e halai liu ba komputador Word Excel Power Point no Publizer, nomos seluk tan hanesan Rekursu humanu, Atendimentu kliente, komunikasaun no ekonomia.
Ko’ordenadora Sentru Formasaun, Irma Carmelinda Ivonia Pereira Belo hatutan, iha Sentru Formasaun sira aprende konaba administrasaun jeral, atendimentu kliente no seluk tan.
“Tamba ne’e iha centru formasaun ida ne’e ita iha sertifikadu administradaun jeral nune materia nebe sira aprende kona-ba administradaun jeral mak atendimentu kliente, Lingua, Matematika, Finansas, Rekursus humanus no Logistika i iha mos costura”, Irma ne’e esplika.
Garduado sira nebe mak gradua, Sentru nafatin suporta sira atu sira kontinua estagio nomos sei foti karta rekomendasaun hodi ba estagio iha fatin ne’ebe sira hakarak.
“Bainbain sira estagio tan fulan ne’en hodi estagio klean liu tan, ami nafatin suporta sira fo karta rekomendasaun ba sira atu ba estagio iha fatin nebe sira hakarak”, nia dehan.
Irma ne’e dehan, tinan ida ne’e sentru formasaun ne’e hetan apoiu finaseiru ho total hamutuk US$. 7000.00 hodi sosa ekipamentu kursu nian.
“ami nafatin hetan suporta husi SEFOPE tinan ne’e ami hetan suporta finasiamemtu hamutuk US$. 7000.00 Dolar Amerikanu, ne’e ami sosa fali ekipamentus ne’ebe suporta ba administrasaun jeral no finansas”, esplika nia.
Sefi Gabinete SEFOPE, Jacinto Ribeiro Dias, hateten SEFOPE kontinua apoiu ba Sentru Formasaun n’eebe hetan akreditasaun tuir proposta ne’ebe sira hato’o hodi fasilita joven sira atu aprende.
” Nune’e bele fasilita joven ne’ebe mak hakarak buka oportunidade iha centru formasaun sira, hodi tulun para hadia ita nia dezenvolvimentu iha Rai laran”, nia esplika.
Nia dehan, sira nia partisipasaun iha Graduasaun ne’e atu halo avaliasaun ba rezultadu, liu-liu atu hare ba ekipamentus ne’ebe SEFOPE apoiu hodi hare nia utilizasaun, nune’e kontinua apoiu liu husi joven sira nia aksaun.
“ami mai tuir Graduasaun atu halo avaliasaun progresu ne’ebe iha, para halo kompilasaun ba material sira ne’e uja ka lae depois rezultado utilizasaun ne’e joven sira uja ka lae, no mós kontinua apoiu joven sira ne’ebe hetan Gradua ona sira tenki halo aksaun propriu, husi aksaun n’eebe sira halo Governu nafati apoiu,” dehan sefi gabinete ne’e
Reportagen : Veru Fernandez
Editor: Shakalista
