Lospalos: Hafoin Guvernu Sentral liu husi Ministeiru Administrasaun Estatal aloka orsamentu $7.628.912, ba munisipiu Lautém. Prezidente Autiridade Munisipal(PAM) Lautém Domingos Savio husu agente estadu atu kaer nafatin Moto Munisipiu nian, “Hamutuk Lautém forsa Forsa Hamutuk Lautem bele” hodi gere Orsamentu Estadu ne’e ho Responsabilidade.
“Ba ajente estadu iha municipiu Lautem sira ita nu’udar Lautem oan, ita tenki kaer metin ita nia moto katak “Hamutuk Lautem forsa, Forsa Hamutuk Lautem bele,” tenki kaer metin ida ne’e duni hodi ezekuta orsamentu ho responsabilidade ho diak tamba osan ne’e povu nian.” informa nia ba Lautém-Post iha nia kanr fatin foin lalais ne’e.
Iha sorin seluk Xefe Departementu kontabilidade servisu munisipal Lautém Joaozito Lopes Dos Santos haktuir, husi montante orsamentu ne’e sei fahe ba kategoria 5 mak hanesan; Saláriu no Vensimentu $2.346.979, Bens no servisu rekorente $512.314, transferénsia públiku ho totál $2.591.53, kapitál menór hamutuk $90.000 no Kapitál Dezenvolvimentu $2.088.088.
“Husi total orsamentu ne’e sei fahe ba kategoria 5 mak hanesan ba Salariu Vensimentu, Bem Servisus, Transferensia publika, Kapital Menor, no mos kapital dezenvolvimentu.” Katak Xefe Departementu kontabilidade servisu munisipal Lautém ne’e.
Entretantu ho total Orsamentu $7.628.912 ne’e, hetan aprovasaun iha Parlamentu Nasional liu husi debate OGE 2024 iha fulan Dezembru tinan 2023, hodi aloka ba prioridade ka programa sira hanesan programa ho númeru 026 foku ba estrada no ponte sira ho totál orsamentu $261.105, programa 028 mak dezenvolvimentu rurál ho orsamentu alokadu $1.929.079, programa 366:seguransa nasionál ho $29.636.
Programa ho númeru 392 mak asesu ba justisa ho orsamentu $45.223, programa 510 mak funsionamentu no dezenvolvimentu institusionál ho $2.163.115
Alende ne’e, programa 520 ne’e foku ba edukasaun Pré-eskolar ho $269.582, Programa 521 foku ba Ensino Báziku ho orsamentu alokadu $1.716.839, Programa 523 foku ba Ensinu Rekorrente $2.448.
Entretantu, Programa ho kódigu 528 foku ba kuidadu de saúde primáriu sira ho orsamentu $203.569, Programa 798 foku ba água no saneamentu $209.370, programa 980 mak inclusaun Sosiál $161.913, programa 982 mak foku ba turizmu ho orsamentu $41.149 no Programa A32 mak foku ba aumentu sustentavél produtividade no produsaun mak alokadu ho orsamentu $595.884.
Reportagen: Nandez Veru.
Editor: Joenaca Tupa da Conceição
