LOSPALOS: Ekipa Palásiu Presidensiál, kuarta ne’e, halo disemimasaun ba dokumentu fraternidade umanu iha munisípiu Lautém, atu hametin valór maun-alin hodi garante pás no estabilidade.
Ekipa hahú disemina Dokumentu Fraternidade Umana ba estudante sira hafoin Ministériu edukasaun hatama ba sistema Kurikulu hodi sai matéria hodi hanorin estudante sira.
Biban ne’e, Asesór PR Assuntu Fraternidade Umana, Nuno Horta, hateten Timor Leste mós hahú lakon ona sentidu Fraternidade tanba ne’e liuhusi rezolusaun númeru 11/2022 ne’ebé Parlamentu fó sai katak Dokumentu Fraternidade Umana sai ona dokumentu Nasionál.
“Nune’e , ami hahú ona sosializasaun iha munisípiu sira liu-liu estudante sira hafoin Ministériu Edukasaun hatama ba sistema Kurikulu. Objetivu mai halo sosializasaun atu molok dokumentu ne’e tama sistema edukasaun estudante sira komprende no hatene neineik ona konteudu husi dokumentu referidu,” dehan Asesór ne’e iha Postu Lospalos.
Asesór ne’e profunda dokumentu referidu fó sai mós husi líder Igreja Katóliku Amu Papa Francisco atu hafanu mundu nia matan hodi bele ka’er metin fila fali sentidu fraternidade umana tanba daudaun mundu hahú lakon valor maun alin.
“Moris hanesan maun alin, feton ho naan iha familia laran no iha sosiedade nia leet. Amu Papa ho Grande profesór Ahmad hakarak atu hafanu fila fali ema hotu iha mundu atu haree fila fali valór maun alin”.
Iha biban hanesan, Diretór EBC Lospalos, Ernesto Dos Santos, hateten dokumentu farternidade umana ne’e importante atu hatama ba materia eskolár nune’e ema hotu bele komprende hodi halo tuir.
“Iha esplikasaun ita rona bele tama iha materia relijiuan no edukasaun sívika nian tanba nudar ema tenke simu malu labele hare ba nia lingua, maibé ita hanesan hotu, nune’e atu ema hotu bele simu malu para labele akontese funu,” afirma.
Reportagen: Veru
Editór: Helefatil
