LOSPALOS- Iha loron 25 Setembru 1999, Membru Milisia Pro-Intergrasaun ALFA halo asasinatu ba ema na’in-sia (9) iha Api-Kuru, diresaun Lautém mai Baucau, besik Mota Veru-koco. Insidente ne’e hanesan akontesimentu ida boot liu, ne’ebé halakon ema nia vida iha Munisipiu Lautém, hafoin Konsulta Populár 30 Agostu 1999.
Iha tempu ne’ebá Diákonu Jacinto Francisco Xavier, hanesan Diretór Cáritas Diosezana Baucau nian, hamutuk ho sira na’in-hitu, bá Lautém hodi vizita no fó asisténsia ba komunidade refujiadu sira iha área Com-Lospalos. Sira na’in ualu kumpre sira-nia misaun nu’udar kristaun no, nune’e, lori naroman uitoan ba komunidade sira ne’ebé hasoru hela situasaun susar tebes, hafoin ita hili dalan Ukun Rasik An iha Referendu 30 Agostu.
Iha insidente kruelidade ne´e konsege hamate mártir na’in-ualu, Diákonu Jacinto Francisco Xavier (Baucau), Frater Fernando dos Santos (Luro-Lautém), Frater Valério da Conceição (Lospalos), Madre Ermínia Cazzaniga (Itália), Madre Celeste de Carvalho (Uatocarbau-Viqueque), foin-sa’e voluntáriu na’in-rua Titi Sandora Lopes no Rudi Barreto inklui Jornalista Indonéziu hosi Press Ázia, Agus Mulyawan
Hafoin oho, membru milisia Pro Indonézia sira so’e mate isin hirak ne’e hamutuk iha mota Api-kuru, alende ne’e mós milisia tiru mate Benedito Marques Cabral iha Eskola Primaria ida nia oin sira.
Iha loron ohin, fó- hanoin mós relijiozu sira seluk, foin-sa’e sira seluk no mós jornalista sira seluk ne’ebé ho sira-nia aten-barani, dedikasaun no determinasaun sakrifika sira-nia vida durante tinan ruanulu-resin-haat hodi ita bele hetan fali ita-nia Liberdade, Ita sei la haluha sira-nia kontribuisaun.
Iha tinan 2017, Estadu Timor-Leste kondekora koletivu relijiozu ne’ebé hetan oho durante períodu “setembru negro” 1999, inklui relijiozu na’in-lima ne’ebé mate iha Api-kuru, ho Medalla Órden Timor-Leste. Órden ne’e harii hodi rekoñese, ho prestíjiu no dignidade, nasionál no estranjeiru sira, ne’ebé liuhosi sira-nia atividade profisionál, sosiál no, liuhusi atu eróiku ka domin ba ema, fó benefísiu boot ba Timor-Leste, timoroan sira ka ba Umanidade.
“HAKMATEK IHA REINU LALEHAN”
Jornalista: EKIPA LAUTÉM POST
