Lospalos: Hafoin Secretariu Estadu Arte no kultura (SEAK) deside hapara kontratu husi funsionarius Kazuais nain 11 iha Lautem, Sentru Kultural Lospalos hahu abandonadu.
Responsavel Sentru Kultural Lospalos Bernardo Caldas deklara, Funcionariu Kazuais iha centru kultural Lospalos la tama serbisu tamba sira nia kontratu hapara ona iha fulan novembru tinan kotuk, tamba ne’e serbisu barak hahu abandonadu.
“Funsionariu kontratadu hamutuk nain 11 la tama serbsiu iha tinan kotuk, ne’ebe husi diresaun arte cultura hapara. Tamba ne’e dadaun ne’e serbisu abandona no hela nain ida mak serbisu”. Dehan nia ba Lautém Post iha nia knar fatiin, Foin lalais ne’e.
“Funsionariu ami hamutuk iha centru cultural Lospalos, permanente ho kontratado hamutuk iha 11 la tama ona serbisu iha fulan novembru, wainhira sira rona katak funcionariu kontratadu hapara. Tamba ne’e agora dadaun serbisu abandona hela.” Nia hatutan tan.
Caldas esplika, husi total funsionariu ne’e nain rua tau matan ba biblioteka iha Iliomar no sira seluk iha Administrasaun Inklui Cleaner no seguransa iha centru cultura Lospalos.
“Funsionariu kazuais ne’ebe tau matan ba biblioteka iha Iliomar nain rua,iha centru Lospalos funsionariu kazuais kompostu husi funsionariu administrasaun, Cleaner no siguransa, ne’ebe agora dadaun ne’e sira para hotu.” Tenik responsavel Sentru Kultural ne’e.
Liga ho serbisu sira ne’ebe abandonado,Responsavel Sentru cultural ne’e husu ba Secretariu Estadu arte no kultura atu bele reativa fila fali sira nia kontratu, hodi nune’e bele assume hikas sira nia kna’ar hodi serbi Sentru kultural Lospalos iha Lautém no nasaun Timor-Leste.
“mensagen ba diresaun ne’ebe ami tutela ba, liu-liu ba lider masimu secretariu estado arte cultura no diretor jeral oinsa ho hanoin fila fali ba ita nia funsionariu kazuais ne’ebe durante ne’e para durante fulan ida resin, karik bele reaktiva fali sira nia kontratu atu nune’e sira bele mai servi Sentru Kultural Lospalos ida ne’e ba municipiu no ba nasaun.” Nia sujere.
Reporter: Nandez Veru.
Editor: Joenaca Tupa da Conceição
