ILIOMAR: Kamioneta ho xapa matrikula 58-698, baku fila iha Suku Kainleu, postu administrativu Iliomar munisípiu Lautém, rezulta Tomas de Jesus, mate iha fatin akontesimentu mo na’in seluk hetan hetan kanek kmaan.
Polísia Seksaun Tránzitu konta kronolijia akontesimentu, iha loron sábadu (16/09), tuku 1 (13:00) kamioneta ida ho kór kinur, tula pasajeiru na’in 7, husi diresaun área Larimi ba suku Iliomar. Maibé, too iha subida (Deuasa), karreta sa’e, derrepente kruzeta (eixo) tohar, provoka karreta hakiduk ho velosidade maka’as, ikus mai karreta baku fila.
Xefe Seksaun Tránzitu Rodoviária, munisípiu Lautém, inspektur polísia, Mozinho da Silva, hateten, vítima na’in 6 ne’ebé sofre kanek kmaan simu tratamentu iha sentru saúde, no vítima mortal (mate) família lori ba halo prosesu funeral.
“Vítima na’in 6. Kanek kmaan, médiku iha postu saúde Iliomar halo kedas tratamentu iha fatin akontesimentu no fila ba kedas ba ida-idak nia uma. Tomas de Jesus ne’ebé mate iha fatin, família deside ba haloot. Rejeita submete ba prosesu autópsia” nia relata ba Lautem post, Segunda, (18/09).
Polísia kontinua prosesa kazu tuir dalan legal, mezmu família halo ona konkordánsia hodi halo prosesu funeral.
“Família halo ona konkordánsia, maibé parte tránzitu nia pozisaun mak tenke prosesa kazu. Kondutór daudaun iha ninia rezidénsia, hein prosesu” dehan nia.
Kamioneta oras ne’e soe hela iha fatin akontesimentu tanba susar atu muda ba fatin seluk.
sorin seluk, vítima na’in neen ne’ebé kanek, husi Watucarbau munisípiu Viqueque, no ida seluk husi postu Iliomar munisípiu Lautém.
Reportajen : Veru Fernandes.
Editor : Black Angel
