Lospalos: Komisaun Organizador nasional ba Vizita Papa Fransisco, SJ, mai Timor-Leste. Aloka ona kamizola hamutuk rihun 48 ba sarani sira iha Lautém hodi utiliza wainhira Partisipa misa iha Tasi Tolu Dili, iha loron 10 fulan Setembru mai.
Secretario administrasaun finansa munisipal Lautém Francisco Dos Santos informa, kamizola hirak ne’e dadaun ne’e rai ona iha regidensia Prezidente Autoridade Munisipal(PAM) Lautém nian no tuir planu sei distribui ba sarani sira ne’ebe registu ona iha Lautém, iha loron 5 fulan Sentembru ka loron 3 antes halo peregrinasaun ba Dili.
“Farda iha parte rua, komisaun nian ketak no pergrinos engeral ketak. Ba peregrinos sira mais de 48 mil ne’e prepradu ona iha rezidensia PAM Lautém nian, hein dia 16 fulan Agusto ami enkontru fahe ba kada postu no paroquia tuir númeru registu no fahe ba sira iha dia 5 setembru, loron tolu antes sira ba Dili.” Informa nia ba Lautém-Post, Tersa(13/08).
Nia esplika sarani sira ne’ebe mak iha ona lista, komisaun sei prepara tranporte ba sira. No ba sarani sira ne’ebe mak uza tranporte rasik, nia hateten sei hetan mos apoiu admistrativu husi komisaun organizadora.
“Transporte komisaun organizadora sei aluga kareta Trek no Bus. Ba sarani sira ne’ebe ho transporte rasik ami kontribui ho administrativu, maibe peregrinus sira prepara sira nia bukae. Iha planu ami labele fo asistensia hahan ba sira, maibe la promete ita sei gere orsmanetu ne’ebe iha hodi prepara parte balun ba sira.” Tenik nia.
Iha sorin seluk reprejentante sarani Lautém Gabriel Ribeiro Da Cruz haktuir, sarani Lautém sente orgullu no kontente ho vijita Santo Padre nian mai iha Timor-Leste, no iha esperansa katak liu husi vijita Santo Padre ne’e bele lori domin no dame ba povo Timor-Leste.
“Vijita Santo Padre nian mai Timor nu’udar sarani sente kontente no orgulu tebes, ne’ebe ita espera katak vijita amu papa nian ne’e bele lori domin, dame no paz ba ita hotu.” Dehan nia ba Lautém-Post, Tersa(13/08).
Gabriel afirma, dadaun ne’e sarani sira iha munisipiu Lautém halo hela preparasaun ba vizita amu Papa nian, tuir nia kada domingu sarani sira sempre halo orasaun ba Sua Santidade Papa Francisco atu iha nia viajen mai Timor-Leste bele ho kondisaun ne’ebe diak hodi bele hasoru malu ho povu Timor-Leste.
“Sarani sira hotu agora iha hela preparasaun ba vijita amu papa nian no ita mos sempre halo orasaun atu nune’e amu Papa halo viagen ho diak to’o iha timor.” Nia haktuir.
Entertantu dadaun ne’e kamizola ba Vizita amu Papa mai Timor-Leste, komisaun nasional Distribui ona kamizola hamutuk rihun 48, iha karon 100 resin ba Munisipiu Lautém, no dadaun ne’e rai ona iha regidensia PAM Lautém nian. No tuir planu sei distribui ba sarani sira husi Postu 6 tuir lista paroquia ne’ebe iha, iha loron 5 fulan Setembu ka loron 3 antes halo peregrinasaun ba Dili.
Reportagen: veru.
Editor: Joenca Tupa da Conceição.