Lospalos: Kandidatu traballadór Palm Scheme iha munisipiu Lautém, hamutuk 2.079 ne’ebé valor teste la prienxe kritéria, sei tuir formasaun dalen inglés, hafoin hakat ba faze entrevista.
Kandidatu traballadór, Aleixo da Costa, rekoñese nia valor rezultadu teste la prienxe kritéria maibé nia promete nafatin esforsu hodi hetan valor di’ak iha etapa tuir mai.
“Sente triste ba valor ne’ebé iha maibé, ida ne sai hanesan prova ida ka evidénsia ida mai ami. nudár joven tenke buka maneira oioin hodi aumenta abilidade tanba naran iha nafatin sistema”, nia espresa ho fiar an, (12/08).
Diretór SEFOPE munisipiu Lautém, Catarinha dos Santos, informa, kandidatu ne’ebé la pasa iha teste eskrita hamutuk, 2.079, kompostu husu valor sufisiente, poor no very poor.
“Ba sira ne’ebé atu mai rejistu fila fali ne’e. Sira ne’ebé nia valor sufisiente, hamutuk 581, poor 1209, no very poor 289”, nia relata.
Kandidatu hirak ne’e, SEPFOPE sei fó oportunidade ba sira, atu submete fali sira nia dokumentu, nune’e sei tuir fali teste hafoin formasaun.
“Sei tuir formasaun durante fulan tolu too fulan 6, hafoin sira aprezenta sertifikadu formasaun dalen inglés, hafoin hakat ba entrevista”, nia esplika.
Kandidatu sira ne’ebé rejistu fila-fali naran iha munisipiu, bele tuir formasaun iha Dili no iha munisipiu.
“Formasaun ne’e mós la’ós obrigasaun mai munisipiu maibé, bele rejistu iha munisipiu no bele tuir formasaun iha Dili tanba sira balu eskola no serbisu, ba sira ne’ebé livre bele tuir formasaun iha munisipiu”.
Entretantu ba kandidatu traballadór ne’ebé antes ne’e tuir teste eskrita iha Lautém, hamutuk ema na’in 3.354.
Husi númeru ne’e, kandidatu pasa ho valor excellent hamutuk na’in 10, very good na’in 110, no good ema na’in 537.
Kandidatu hirak ne’ebé la pasa, hamutuk 2.079, kompostu husi valor sufisiente ema 581, poor 1.209, no very poor 289.”
Fatin formasaun ne’ebé SEFOPE munisipiu Lautém prepara ba kandidatu sira mak, eskola Tekniku Vokasional no 1 Lospalos, Salaun CVTL, Correius no Salaun SEFOPE nian.
Reportajen: veru.
Editor : B. Angel
