LOSPALOS – Reprezentante Konsellu Imprensa Timor-Leste (CI), Konselleiru Amito Araújo, ho tékniku husi Diresaun DAJUS, halo enkontru ho Jornalísta Rádiu Komunidade Lospalos (RCL), Jornalista RTTL Destakadu Munisipiu Lautem, Online www.lautem-Post.com, no Jornalista Televizaun Edukasaun (TVE), hodi introdus kna’ar no kompeténsia Conselho de Imprensa de Timor-Leste nian .
Konselleiru Konsellu Imprensa Timor-Leste , Amito Konusere Araújo, afirma objetivu enkontru ho Médiál lokál Sira atu fahe imformasaun Konsellu Imprensa nian no mós rona preokupasaun média lokál sira nian iha tereñu.
“Ohin, Konsellu imprensa halo enkontru hamutuk ho Rádiu Komunidade Lospalos Inklui Média Lokál sira ne’ebé hamutuk iha ne’e ne’e hanesan www.Lautem-post.com,RTTL no mós TVE-Timor hodi fahe informasaun kona-ba Papél Konsellu nian no mós atu rona preokupasaun ne’ebé Jornalista sira enfrenta durante hala’o serbisu Jornalizmu-nian iha baze hodi buka solusaun,” Konselleiru Amito afirma.
Iha sorumutuk ne’e, Konselleiru Konsellu Imprensa husu ba Jornalista sira atu hala’o kna’ar tuir kódigu Etika Jornalista nian no lei Komunikasaun Sosiál hodi rekolla Informasaun ho loos no kredivél.
Iha fatin hanesan, Jestora Rádio Komunidade Lospalos (RCL), Ermelinda Da Silva Pereira, agradese ba Ekipa Konsellu Imprensa Timor-Leste (CI), ne’ebé introdus Servisu Conselho de Imprensa nian ba sira iha Munisipiu, no esplika kona-bá regulamentu sira Conselho de Imprensa nian, no mós kona-ba Lei no kompeténsia tomak husi Conselho de Imprensa.
Jestora ne’e mós husu kona-ba kritériu no prosedimentu sira atu hetan karteira Profisionál husi Conselho Imprensa Timor-Leste (CI).
Alende ne’e, Konseleiru Amito Araújo, hala’o mós enkontru ho Prezidente Autoridade Munisipiu Laútem, Melio de Jesus, hodi introdús kompeténsia Conselho de Imprensa de Timor-Leste nian ba Prezidente Autoridade ne’e, nomós kontinua esplika kona-ba progresu no dezafiu servisu Conselho de Imprensa nian.
Iha enkontru ne’e mós enkonraja Prezidente Autoridade Munisipiu (PAM) Laútem atu involve mídia iha atividade sira PAM nian.
Alende ida ne’e, Rekomenda ba PAM atu promove liberdade imprensa liuhusi ezerse direitu resposta no retifikasaun, nune’e akontese disputa mídia ka kestaun iha publikasaun husu ba PAM atu halo komunikasaun ho autoridade relevante nune’e bele hetan solusaun.
Reporetajen: Veru
Editór: Helefatil
