Lospalos: Sekretáriu Estadu Kooperativas (SECOOP sigla portugés) kolleta BAFO Kayrala no batar iha munisípiu Lautém ne’e Movimentu Kamponezes Timor-Leste kuda iha tinan kotuk.
Sekretáriu Estadu Kooperativas, Arcenio Perreira da Silva, hateten, kolleta batar BAFO Kayrala no batar baibain ne’e atu avalia toos nain sira nia rezultadu produsaun iha époka ida ne’e.
Governante hateten, Bafo Kayrala nia funsaun la’os ba konsumu ema nian de’it maibé bele fó han ba balada sira.
“Objetivu atu kolleta ida ne’e, atu haree batar bainbain no mós produtu sira seluk. BAFO Kayrala ne’e kuandu prosesa ona ba mákina, ninia valores barak tanba produtu sira ne’e la’os ba konsumu ema nian de’it maibé, ba mós balada sira ne’ebé ita hakiak”, nia esplika.
Durante ne’e, governu importa sasá barak husi rai liur tanba produsaun rai laran menus, tanba ne’e, toos na’in tenke aumenta produsaun iha rai laran nune’e diminui produtus importadus.
“Tinan tinan ita mos difísl aihan tan ne’e, ita nia governu sempre importa fós no produtu sira seluk. Bafo Kayrala ne’e atu diminui importansaun”, Arcenio garante.
Prezidente Mocimentu Kamponezes Timor-Leste (MOKATIL) munisípiu Lautém, José da Costa, hateten, sekretáriu Estadu Kooperativa kolleta Bafo Kayrala ektare 5 maibé tanba animál han balun, entaun hela de’it ektare 2.
“Iha ne’e hamutuk ektares 5 hamutuk ho batar baibain ektare 21 maibé, karau han Bafo ektare 3, entaun ohin ita kolleta ektare 2 hanesan ne’e”, nia relata.
Entretantu, Movimentu Kamponezes Timor Leste ( (MOKATIL) iha Lautém la’os kuda de’it Bafo mabé kuda mós produtu seluk hanesan,fore, forerai, fehuk, lakeru, batar no hudi.
Reportagen: Veru.
Editor : B.A
