Lospalos – Kauaza husi Mudansa Klimatika sai nu’udar preukupasaun Mundial ne’ebe mak entidades hotu iha mundu ohin loron preukupa, tamba ne’e Associação Kolping iha Munisipiu Lautem husu ba sidadaun Timor-Leste atu kuida ambiente no prezerva bee matan sira atu labele maran hodi fo benefisiu ba animais sira.
Prezidente Associação Kolping Nasional Timor-Leste, Maria Ligia De Fatima, fanu no ejije ba entidade hotu atu tau atensaun no foti atuasaun imediatu hodi hamenus kauza husi impaktu krize husi klimatiku no problema ambiental ne’ebe mak a’at ba beibeik ne’e.
“ema hotu iha dever, obrigasaun no responsabilidade atu konserva kriasaun nebe iha, labele soe lixu arbiru hodi estraga ambiente.” dehan Prezidente hafoin iha nia diskursu hafoin halo Abertura ba semenariu ho nia tema “Hamutuk ho kolping luta ba transaformasaun social no ekologia tuir doutrina sosisal kreda katolika” hodi komemora loron mate Beato Adolph Kolping, segunda,(04/12)
Iha fatin hanesan Pe. Cesar Joaquim, SDB, konfirma Mudansa klimatika sai preokupasaun iha mundo inklui uma Kreda Katolika ne’ebe fo sai liu husi karta amu Papa Francisco nian iha foin lalais ne’e ho nia titulu Laudatu si, ho laudate Deum hodi hafanu ema hotu atu bele tau matan ba ita nia uma komum no foti aksaun imediatu hodi salva lalais problema krize ambiental ne’e.
“Mudansa Klimatika sai preokupasaun inklui Kreda Katolika liu husi karta Amu Papa Francisco nian konaba teknologia no meiu ambiente ne’e resposabilidade fila fali ba ema tamba ne’e ema hotu iha responsabilidade tau atensan ba planeta ou terra ida ne’e, tamba rai mak sai hanesan inan tamba ne’e responsabilidade ita ema ka grupu ida kolabora malu hodi tau atensaun ba terra ne’e”, dehan nia.
Amu lulik ne’e afirma, Tuir Matebian Amu Papa Bento XVI, Problema Krize Ambiental ne’e laos deit Problema Ekologia maibe mos problema Antropologia. Tanba Tuir nia Problema ne’e laos iha ambiente, maibe problema ne’e iha ema, tanba ne’e nia husu atu oinsa bele muda ema atu la bele Estraga Tan Ambiente.
Nune’e Pe. Cesar husu atu kontinua halo kampaña konaba problema Ekologia nian nune’e bele fanu konsiensia ema nian hodi bele kuidadu ambiente.
Iha sorin seluk Koordenador Meiu Ambiente Munisipiu Lautem, Delcio Guimaraes informa, komunidade sira tenki respeita ambiente no natureza atu labele fo malisan ba ema hotu.
Nia dehan buat ne’ebe it simu agora, ida ne’e impaktu husi saida mak ita ema halo. Nune’e neneik ba bebeik natureza kastigu fila fali ita atu ita bele arepende ho ita nia hahalok sira ne’ebe mak ita halo.
“Husu ba ita hotu atu konseinte hodi kuida didiak ambiente ba dezenvolvimentu sustentavel, atu ambiente labele fo malisan ba ema”, nia hameno.
Iha biban hanesan Sekretariu Munisipiu Lautem, Jacinto Da Costa, apela ba sidadaun hotu atu labele sunu rai no tesi ai arbiru tamba fo impaktu ba bee matan no ameansa ba balada sira inklui animal ne’ebe komunidade hakiak.
“Atu proteze nafatin natureza ida ne’e, labele sunu rai arbiru no tesi ai arbiru tamba fo impaktu ba bee matan sira no fo ameansa ba balada sira liu-liu, animal sira nebe inan aman sira hakiak ne’e“, Sekretariu ne’e esplika nia wainhira halo abertura ba Semenariu ekologiku ne’e.
Entretanto Associação Kolping hari husi padre Beato Adolph kolping iha Tinan 1846 iha Alemaña nu’udar organizasaun katoliku hodi haklaken doutrina Sosial Kreda Katolika nian. No dadauk ne’e Assosiasaun Kolping tama ona iha nasaun hamutuk 66 iha mundu inklui Timor-Leste.
Reportagen: Veru Fernandez.
Editor: Shakalista
