Lospalos: Viajen servisu tuir konseitu rua mak hanesan “Fatin no tempu” ne’ebé regula ita hodi halo knar tuir tempu, hodi ejerse ita knar iha fatin seluk.
Komandante PNTL Lautém sesante Superintendente Polísia, Antonio Rego Fernandes, hateten, viajen servisu bazeia ba konseitu ne’ebé iha, hanesan “fatin no tempu”, tanba tempu regula ema ida hodi hala’o servisu iha fatin seluk.
“Sevidores estadu PNTL no FFDTL ne’ebé sempre regula konseitu rua mak hanesan tempu no fatin, tempu mak determina hodi hakat ba fatin ida hodi ejerse ita nia funsionamentu ne’ebé superior tutela ba ita”, eis komandante fó hanoin liu husi nia diskursu. Sabdo (12/01).
Eis komandante agradese ba autoridade Lautém tanba kria kooperasaun servisu hodi asegura munisípiu Lautém.
“Agradese ba autoridade Lautém. Serbisu lubuk ida ne’ebé ita halo ona no balun finaliza, no balun seidauk tenke kontinua, no balun ne’ebé planeia daudauk iha tempu oin mai hodi serbí ita nia sosiedade liu-liu asuntu seguransa ne’ebé importante liu ba konstrusaun estadu nian hodi dezenvolve Timor-Leste no rai Lautém”, nia agradese.
Nia hateten, PNTL nia prezensa iha komunidade nia leet tenke envolve an iha sosiedade atu nune’e sosiedade bele sente seguru.
“Ita nia prezensa no patrullamentu mak tenke iha nafatin komunidade nia leet nune’e komunidade sente seguru”, nia dehan.
“Lia menon ba komunidade munisípiu Late, nafatin koopera ho komandante foun ne’ebé mak atu mai iha munisípiu Lautém, hodi tane nafatin seguransa iha ita nia munisípiu Lautém para dezenvolvimentu ne’ebé mai ita asegura, bele fó kampu traballu ba munisípiu Lautém”. Nia hakotu.
Reportagen : Nandez Veru
Editor : Black Angel
