Lospalos: Komandante Polisia Nasional Timor-Leste (PNTL munisipiu Lautém superintendente João da Costa relata, dadaun ne’e komandu PNTL Lautém enfreta probela menus infrastutura no rekursu umanu.
Tuir nia, dadaun ne’e komandu PNTL Lautém emfrenta problema laiha kajerna ba membru, menus ekipamentu hanesan kareta no motor, menus aramas, inklui komputador no menus rekursu umanu hodi difikulta PNTL Lautém atu halo serbisu.
“Komandu munisipiu Lautém enfrenta menus rekursu humanu, rekursu ekipamentus hanesan transporte kareta no motor, ekipamentu armas, ekipamentu komputador, avaria.” Katak nia ba Jornalista Lautém-Post, hafoin hetan vijita husi Ministru Interior Francisco da Costa Guteres, iha komandu PNTL munisipiu Lautém, Kinta (06/02) ohin.
Kona-ba infraestrutura nia dehan, hatoo ona ba nasional maibe too agora seidauk hadia.
“Infrastutura eskudra 5 laiha espasu, iha postu foun Lore eskuadra too agora laiha kajerna, iha uma sanolu maibe kondisaun grave tebes laiha moru protesaun.” Nia lamenta.
Hatan ba problema ne’e Ministru Interior Francisco da Costa Guteres konfirma, katak tinan ne’e ministeriu sei fo prioridade uluk ba estatutu PNTL inklui regime salariu PNTL nian nune’e sira bele iha vontade servisu hodi servi povu ho diak.
“Tinan ne’e rezolve uluk sira nia vida estatutu para sira bele serbisu ho diak, haree ba regime salariu oinsa hadia salariu ho diak no promosoens ka nia diviza responde uluk ida ne’e para sira serbisu ho laran.” Dehan nia ba Jornalista Lautém-Post hafoin vijita komandu PNTL munisipiu Lautém, Kinta (06/02) ohin.
Nia afirma, tinan ne’e governu sei rezolve uluk regime no estutu pntl nian hafoin hakat ba problama sira seluk hodi rezolve ho fazeadamente.
“Mai iha ne’e atu rona sira nia kondisoes oinsa para ita buka sulusaun, tamba ne’e ita sei responde gradualmente. Politika ministeriu interoir mak atu haree ba ida-ne’ebé importante liu depois mak ita halo fali infraestrutura no ekipamentus, nune’e sira bele serbisu ho diak no fo informasaun ne’ebé governu dadaun ne’e halo liu-liu rekrutamentu nian.” Nia argumenta.
Entretantu total membru PNTL iha munisipiu Lautém dadaun ne’e hamutuk ema nain 136 membru permanente, kompostu husi mane 109 no feto 26.
Reportagen: Veru.
Editor: Joenaca Tupa da Conceição.
