LOSPALOS— Komandante Jerál PNTL, Komisáriu Jerál Polísia, Henrique da Costa, sesta ne’e, hasai ona despaixu ho númeru 441. CG-PNTL/IX/2023, hodi orienta ba Inspetór Jerál no Departamentu Justisa PNTL atu forma ekipa hodi hakle’an investigasaun ba kazu okum PNTL tiru joven, Martinho Gonsalves, iha área Pairara, suku Maina I, Postu Administrativu Lautém, Munisípiu Lautém.
Kazu okum PNTL tiru joven ne’e akontese maizumenus iha tuku 19:00 kalan iha area Pairara, suku Maina I, bainhira PNTL sira tun halo atuasaun iha konfrontu ida, iha okum PNTL deskonfia uza arma pistola tiru joven Martinho Gonsalves (26) hodi rezuta kanek iha ain rua tohar hotu.
Portavós Komandu Jerál PNTL António da Luz hato’o kronolojia akontesimentu katak problema ne’e hahú hosi futu manu fatin, iha oras 15:00 iha joven nain rua mai asiste futu manu, iha ne’e joven nain rua ne’e hahú diskute malu, joven nain rua ne’e, ida Grupu Arte Marsiál Pesaudaraan Setia hati Terate (PSHT) ida seluk Grupu Arte Rituál 77.
“Iha prosesu Investigasaun mak rezultadu hatudu katak kuandu kazu ne’e krime, Komandu Jerál sei kontinua prosesu ne’e ba Ministériu Públiku hodi hetan prosesu kontinuasaun”, refere Notísia ne’ebé Lautém Post asesu hosi portal Agéncia TATOLI, I.P.
Komandante da Luz hateten membru PNTL ne’ebé momentu ne’e halo atuasaun hodi tiru pistola hodi rezulta joven ida ho kanek gravé, membru ne’e mak ho inisiál AR.
“Sim, ita-nia membru ne’e agora daudaun asegura ona iha Komandu PNTL Lautém, nune’e nia labele halo movimentu ba mai to’o hein investigasaun”, nia dehan.
Portavós ne’e konta iha diskusaun hosi joven na’in-rua ne’e to’o hamosu problema, entre sira nain rua no iha tuku 18:00 problema ne’e alastra ona no sai bo’ot, nune’e komesa mosu konfrontu asalta malu entre joven sira iha área Pairara nian.
Hosi asalta malu ne’e, rezulta uma rua hetan estragus ho nune’e komunidade sira sente pániku no tauk mak komunidade sira kontatu ba Komandante Eskudra Laspalos Vila.
No iha tuku 19:00, membru hosi eskuadra PNTL Lospalos Vila kompostu hosi ema na’in-lima, tún kedan iha fatin akontesimentu hodi halo atuasaun, atu buka tuir joven sira ne’ebé halo problema ne’e.
PNTL sira tún ba halo atuasaun ho maneira aprosimasaun ho joven sira, atu nune’e hapara joven sira nian asaun hodi labele hamosu tán konfrontu.
Maibé iha joven lubuk ida mak hamrik iha foho leten iha área Hutunia Pairara, iha Aldeia Kaporo, Suku Maina I, komesa hakilar polísia sira no insulta polísia ho liafuan milisia depois sira (joven) leno lampada (lampda) ba polísia sira nia matan, depois sira tuda polísia.
”Tanba haree ba joven barak no membru PNTL ne’ebé halo atuasaun nain lima de’it, entaun iha membru PNTL ida mak halo tiru adverténsia ka tiru sae (tiru alarma) ho objetivu hodi hafahe tiha joven sira hodi labele halo tán asaun. Maibé momentu membru PNTL tiru sa’e entaun pozisaun pistola ne’e se ba foho leten entaun kala kona joven ida, ho insidente ne’e membru PNTL ne’e sira mós la sente dehan katak tiru kona joven ne’e”, António da Luz ba jornalista sira iha Komandu Jerál PNTL Caicoli sesta ne’e.
António da Luz hateten, bainhira joven Martinho Gonsalves hetan ona kanek mak nia kolega sira lori nia tún hosi foho mai tau iha rai tetuk no polísia sira ajuda joven ida kanek ne’e lori ba óspital Lautém.
Joven ne’e, agora daudaun, lori ona mai iha HNGV-Dili, hodi kontinua halo tratamentu intensivu.
Jornalista : Ekipa Lautem Post
