Lospalos- Hanoin hikas akontesimentu Masakre Muapitin ba dala 40, Assosiasaun Ira-lalaru husi Suku Muapitine sei organiza Eventu Desportivu ho modalidade Futebool Sub-20 iha Munisipiu Lautem.
Membru Assosiasaun Ira-lalaru suku Muapitin Delsio Gimarães hateten, komemorasaun masakre Muapitene ne’e uniku oituan tanba tama ona ba tinan 40 (08/12/1983-08/12/2023), tanba ne’e Muapitin oan sira ne’ebe kompostu husi familia Vitima masakre, Veteranus, Intelektual suku no komunidade sira sei selebra diferente ho komemorasaun sira iha tinan sira liu ba.
Delsio informa, ligado ho komemorasaun tinan 40 ne’e atividade sira hahu lao ona iha fulan Agustu nia laran.
“atividade ida maka atu organiza eventu desportivu sub-20, ho idade 20 mai kraik to’o 17 iha nivel Munisipiu. Ita sei organiza ida ne’e hodi halao iha Lospalos vila. Entaun ita kordena ona entre fulan jullu nia laran no ita halo ona enkontru ho Assosiasaun Futebool Lautem para oinsa bele organiza idane’e” informa nia ba Lautem Post, Segunda(14/08).
Nia esplika Assosiasaun Futebool Munisipiu Lautem mak nu’udar organizasaun ida ne’ebe maka iha responsabilidade atu Organiza eventu futebool sira iha Munisipiu Lautem. tanba ne’e Assosiasaun Ira-lalaru fo fiar ba sira atu koordena, inklui fo fiar hodi registu klubu sira ne’ebe mak eziste iha Postu Administrativu Ne’en iha Munisipiu Lautem.
“To ohin loron informasaun ne’ebe ami hetan iha equipa 12 maka registu ona, maibe tuir planu ita sei regista ekipa hamutuk 32 maibe foin mak ida ne’e. Ita espera katak to’o semana oin ekipa barak mak sei mai registu tan, para sira bele kompleta hodi compete iha eventu ne’e”. Nia informa.
Eventu desportu ne’e sei hahu halo abertura iha loron 30 fulan Agustu iha nivel Munisipiu no sei remata iha loron 5 fualan Dezembru, hafoin ne’e sei pauza loron rua antes ba komemora loron masakre ne’ebe mak sei halao iha Loron 8 fulan dezembru Tinan ne’e.
“Jogu ne’e sei hahu halo abertura iha loron 30 fulan Agustu, iha loron 5 fulan dezembru ita sei taka no ensera jogu ne’e. loron 2 ita deskansa depois iha loron 8 fulan Dezembru ita sei komemora loron masakre Muapitin”. Tenik nian
Tuir planu, iha komemorasaun ne’e Assosiasaun Ira-lalaru sei halo mos lansamentu Peskiza ba historia luta Muapitin oan sira nian, lansamentu ba sitiu turistiku ligadu ba historia, Konsertu muzikal, aprezentasaun Poezia no Drama hodi anima familia vitima no komunidade sira iha Munisipiu Lautem, inklui husu misa ba vitima Masakre sira.
“Tuir planu ita sei organiza mos konsertu muzika iha Munisipiu Lautem, ne’ebe ita kordena hela ho ekipa Lan Tava para depois bele organiza ida ne’e hodi bele anima no halo kontente komunidade sira, liu liu ba familia vitima sira, depois halo mos drama no mos sei husu misa ba vitima masakre sira”. nia afirma
Enkuatu orsamentu ba komemorasaun ne’e sei mai husi kontribuisaun Komunidade, inklui familia vitima, Veteranu no intelektual suku Muapitin rasik.
“ami deside ona katak ita tenke realiza duni, biar orsamentu kiki mais ita tenke halo. Tanba korenta anus ne’e loron especial ba sira, kada tinan ita sempre komemora maibe komu tinan hatnolu ona entaun ita tenke hare didiak ba assuntu ne’e” nia argumenta
Alen de ne’e nia hateten, jogu ne’e hanesan taxa rotativa, nune’e klubu sira ne’ebe registu sei kontribui $ 50 dolar hanesan garantia, no $ 100 dolar ba Registu.
“Entaun ita bele hanoin katak se iha Klubu 20 resin mak mai regista, entaun ita iha ona orsamentu para bele organiza eventu desportu ne’e hodi bele anima komunidade sira iha Munisipiu Lautem”. Nia hakotu
Reportagen: Ekipa Lautem Post
Editor : Joenaca Tupa Da Conceicao
