Lospalos: Anin sobu sede aldeia Sorulua, suku Souro, postu administrativu Lospalos munisípiu Lautém iha tina 2016.
Durante tinan 7 (2016-2024), autoridade komunitária Aldeia Sorulua ho nia komunidade uza de’it ai-mahon bainhira realiza enkontru.
Xefe aldeia Sorulua, Júlio Fernandes da Cruz, aprezenta ona proposta ba xefe suku Souro hodi reabilita sede aldeia maibe to’o agora seidauk hetan resposta.
Júlio dehan, públikasaun média bele fo hanoin ba governantes hodi reabilita sede suku.
“Sede aldeia ne’e aat durante tinan 7, kauza husi dezastre natural (anin boot). Ha’u aprezenta problema ne’e ba PNDS (Programa Nasionál Dezenvolvimento Suku) maibe seidauk iha resposta”, xefe suku ne’e lamenta.
Hatán ba Preokupasaun ne’e, Xefe suku Souru, Roberto dias Vieira, hateten, sei hato’o autoridade komunitária nia preokupasaun ba administrador postu Lospalos hodi buka solusaun.
“Komunidade fó ona fiar mai ha’u ne’e, ha’u sei esforsu hodi aprezenta problema ba administrador postu”, nia promete.
Suku Souro, iha aldeia 7, maibe aldeia 3 mak seidauk iha sede aldeia mak, aldeia Louru, Foema’a no Nairete.
Reportagen: Veru.
Editor :A.B
