Lospalos: Relasiona ho kondisaun kareta Funerario 2 ne’ebe mak avaria ona durante tinan 3 hahu husi tinan 2021, husi total kareta funerariu 4 ne’ebe mak halo operasaun iha munisipiu Lautém difikulta komunidade transporta mate isin ba nia moris fatin wainhira akontese kazu ema mate liu nain 2 iha loron ida nia laran.
Liga ho situsaun ne’e komunidade Lospalos Fini Ponta-Leste husu ba autoridade munisipiu Lautém atu konsidera situasaun ne’e nu’udar prioridade ba guvernu lokal nian ba iha Orsamentu geral Estadu nian(OGE) iha periode tuir mai hodi nune’e bele aumenta tan kuantidade husi karreta funerariu iha munisipiu Lautém.
“Preokupa ho kondisaun carru funerariu ne’ebe mak avaria durante tianan 3 ona, difikulta komunidade sira wainhira loron ida ema mate nain 3 ba leten, pasensia tenki hein caru funerariu refere halo uluk atendimentu ba ida mak atende fali ida seluk”. Katak Fini ba jornalista media Lautém-Post foin lalais ne’e.
Fini haktuir kareta funerariu foin dadauk iha kuantidade 4 maibe hela deit 2 mak halo operasaun tanba 2 seluk avaria ona. Tuir nia, hare ba situasaun ne’e fo impaktu bo’ot ba prosesu funebre nian wainhira loron ida akontese ema mate nain 3 to’o nain 4.
“Tamba foin dadauk ami hakoi saudozu ida iha rau moko, kareta funerariu ida ba Iliomar no ida ba raumoko sucu Daudere nian. Maibe iha momentu ne’eba saudozu ida mate iha sucu Eukise, hakarak ka lakohi motorista tenki tula uluk eukise nian mai husik iha igreja depois mai tula fali saudozu ba fali daudere depois fila mak ba tula fali iha eukise ba Vaniria.” Esplika Sekretariu Exekutivo CCLN Munisipiu Lautém ne’e.
Tamba ne’e nia husu ba autoridade maximo maunisipiu Lautém nia atu preve orsamentu ba carru funerariu nian, atu nune’e ba tinan oin bele aumenta tan kuantidade carru funerariu iha munisipiu Lautém.
“Husu ba ukun nain sira, presidente autoridade munisipiu atu tan orsamentu. Nune’e bele fasilita no prepara ba OGE 2025 nian para prepara kareta funerariu 3 ka 4.” Tenik nia.
Relasiona ho asuntu ne’e diretur Servisu Munisipal Asaun Social (SMAS) Advento Jeronimo konfirma, katak dadaun ne’e caru funerariu hela deit rua tamba ne’e nia parte halo atendimentu ba komunidade tuir sira nia pedido.
“Carru funerariu ita nian iha ne’e 4, maibe rua mak avaria ona no hela deit rua. Ida avaria iha 2021 no ida fali avaria iha 2024, ne’ebe agora dadaun ita iha deit karu funerariu rua de’it. Agora ita halo gestaun para atende ida por ida, ida ne’ebe hato’o uluk pedido mai ami atende uluk mak ida ne’e.” esplika director SMAS ne’e.
Nia hatutan liga ho asuntu ne’e nia parte hato’o ona pedido ba parte relevante hodi husu tan carru funerariu foun mai iha munisipiu Lautém, no iha ona tenderizasaun husi kompaña maibe to’o ohiin loron siedauk iha rezultadu.
“Iha 2023 hato’o ona pedidu no agora dadauk ita husu tan kareta rua no agora dadauk iha ona prosesu nia laran, tenderizasaun liu ona, tuir lolos iha tinan ne’e nia laran kareta foun atu mai ona maibe ami hetan informasaun katak sei iha hela prosesu nia laran .” nia hatutan tan.
Diretor ne’e afirma bazea ba proposta Servisu Munisipais Asaun Social (SMAS) nian ba orsamentu tinan 2024 nian, SMAS koloka orsamentu ho total hamutuk Dolar Amarikanu rihun 90.00 hodi sosa tan kareta funerariu foun rua ba munisipiu Lautém no prosesu tenderizasaun la’o ona no hein deit ba prosesu distribuisaun nian.
Alen de ne’e ba kareta funerariu rua ne’ebe mak dadaun ne’e avaria husi parte vnasional foti ona lista no tuir mai sei loke ba prosesu leilaun nian.
Reportagen : veru.
Editor: Joenaca Tupa da conçeicão
