Lospalos: Komunidade Munisipiu Lautém kontinua preokupa ho kondisaun estrada ne’ebé liga husi postu Lautém too Postu Lospalos villa, ne’ebé durante tinan barak difikulta movimentasaun transporte públiku no privadu.
Komunidade munisípiu Late, Acacio Fini Ponta Leste, sente lamentavel tanba estrada diresaun Postu Lautém Liga ba Postu Lospalos aterru de’it ho rai-mutin ne’ebé hamosu tahu iha tempu udan.
Fini dehan, Ministériu Óbras públikas tenke tau atensaun ba estrada refere, nune’e komunidade asesu ho di’ak.
“Governu tenke hadi’a, se lae, iha tempu bain loron, komunidade han rai-rahun no tempu udan, halimar iha tahu laran” joven rezisténsia ne’e kestiona.
Iha Fatin hanesan, Rita Kolisina Amaral Fernandes, husu Prezidente Autoridade Lautém atu fó prioridade ba infrastrutura bázika.
“Nudár komunidade, iha esperansa boot ba PAM foun, ne’ebé agora daudaun kolabora ho ministériu obras públikas atu hadi’a estrada iha Lautem”, nia laran metin.
Administradór postu Administrativu Lospalos, Olderico Coimbra, promete, sei tau prioridade ba komunidade nia preokupasaun durante nia mandatu tinan 5.
Coimbra esplika, daudaun ne’e PAM iha Dili hela hodi halo konsultasaun ho liñas ministeriais relevantes hodi lori dezenvolvimentu ba munisipiu Late.
“Liga ba estrada nasionál husi Lautém too Lospalos, nia prosesu daudaun ne’e la’o hela. PAM iha Dili ko’alia ministériu relevanes hodi hadi’a estrada iha Postu Lospalos, Lore no Ilomar”, dehan nia.
Relasiona ho problema estrada iha munisipiu Lautém, Jornalista Lautém-Post seidauk halo konfirmasaun ho Obras publicas tanba diretór ho PAM Lautém sei iha Dili.
Reportajen : Veru
Editor : B.A
