Lospalos: Sistema ajendamentu Online, nudár meiu ne’ebé governu hamosu hodi fasilita kliete bainhira trata dokumentu iha konservatóriu rejistu notariadu.
Sistema ne’e, kliente rejista nia naran liuhosi sistema online, hafoin hakat ba trata dokumentu iha efísiu diresaun konserva rejistu no notariadu.
Maske nune’e, kliente barak seidauk iha koñesimentu kona-ba rejistu (ajendamentu) online refere, tanba ne’e, kliente husu ba governu, disemina sistema antes implementa.
Kiente, Cicilia Fernandes, hateten, atu hafasil komunidade iha area rurál, presiza fahe informasaun.
“Tanba komunidade barak la asesu ba media online no balun iha telefone andorid maibe rede laiha, presiza fahe informasaun klaru”, dehan kliente.
Diretór munisipál Konservatóriu Rejistu e Notariadu, Munisípiu Lautém, Amandio Alves Gomes, argumenta, komunidade tenke hare ba futuru, sistema ne’e online ema sei komprende bainhira utiliza beibeik.
Dirijente observa, sistema atendimentu online ne’e, iha komunidade balun pro no balu kontra maibé, sistema ne’ebé governu kria ne’e atu fasilita povu.
“Ohin loron ita seidauk komprende mas kuandu sistema iha beibeik ona, ha’u fiar katak ita nia inan aman komunidade sira sei hatoman aan”, nia otimismu.
Sistema aJendamentu online ne’e, aplika ba tratamentu pasaporte, Sertidaun nasimentu, Óbito, kazamentu inklui registu kriminal.
Servisu registu notariadu munisipál sei hein orientasaun husi diresaun geral (nasionál).
Reportagen: Hala Veru.
Editor : A.B
