LORE: Komunidade Postu Administrativu Lore, munisípiu Lautém kontinua halerik ba kondisaun estrada ne’ebé la fasilita atu lori produtu lokál ba merkadu, maske área referida potensiál ba agrikultura, peska no turizmu.
Xefe Suku Lore II, Eurico da Costa, husu ba governu atu tau atensaun ba kondisaun estrada postu lore tanba difikulta komunidade asesu bá merkadu hodi faan sira nia produtu lokál.
“Produsaun agríkola durante ne’e barak, maibé estrada mak sai preokupasaun ba komunidade sira, ko’alia kona-ba atu hasa’e produsaun agrikultura nian no produsaun peska nian maibe kondisaun estrada la diak oinsá mak bele asesu ba merkadu. Tanba ne’e ami husu ba governu atu tau ona politika atu bele responde nesesidade povu nian,” dehan Xefe Suku ne’e iha serimónia loron mundiál ai-han.
Governu promote hadi’a iha 2025
Hatan ba preokupasaun ne’e, Vise Primeiru Ministru II no, Ministru Koordenadór Assuntu Sosiál, no Ministru Dezenvolvimentu Rurál no Abitasaun Komunitaria, Mariano Assanami Sabino, hateten infraestrutura bázika sai prioridade ba governu da-sia tanba ne’e iha ona aprovadaun katak tinan oin sei halo konstrusaun estrada diresaun Lautem bá Com no Lautém bá Lospalos.
“Nonu governu fó prioridade infraestrutura estratéjiku ne’ebé fasilita ekonomia inklui estrada tanba ne’e tinan oin ho orsamentu ne’ebé aprova ona mak ida estrada Lautem bá mai Lospalos, Lautem bá com inklui Lospalos bá Lore ne’ebé hein katak bele la’o di’ak. seluk mak Lospalos ba Lore inklui Lautem bá Luro hein katak tinan oin bele book ona para fasilita komunidade sira,” governante ne’e promote.
Vise Primeiru-Ministru ne’e, salienta tan katak konstrusaun estrada diresaun Lautem bá Com no Lautem mai Lospalos hetan ona aprovasaun husi konsellu ministru katak sei konstrui uluk hafoin hakarak ba iha diresaun estrada sira seluk iha munisípiu Lautem.
“Osan ne’e konsentradu iha fundu ne’ebé balun iha tinan ne’e ami aprova ona iha Konsellu Ministru maka rua ne’e depois tinan oin mai fali prosesa hela bainbain halo iha KAFI kuando aprova aprezenta ba konselLu ministru aprova ba ona konkursu públiku depois ezekuta projetu,” Assanami afirma.
Entretantu iha loron 21 Novembru 2024, Konsellu Ministru aprova projetu sira ne’ebé aprezenta husi Ministru Obras Públika, Samuel Marçal, hodi delibera:
- Autoriza despeza ba reabilitasaun no manutensaun ba seksaun estrada entre Lospalos no Lautem, ho naruk km 27,980, ho valór obra ne’ebé prevee dolar amerikanu millaun 22,7.
- Autoriza despeza ba reabilitasaun no manutensaun ba seksaun estrada entre Lautein no Kom, ho nia naruk km 19,760, ho valor obra ne’ebé prevee dolar Amerikanu millauns 13,8.
Reportajen: Veru
Editór: Helefatil
