Lospalos: Polísia nasionál Timór-leste iha munisipiu Lautém asegura ona suspeitu sira ne’ebé envolve konfrontu entre apoiantes ho apoiantes ba kandidatu xefe suku na’in rua iha Ailebere Iliomar, ne’ebé rezulta joven na’in rua hetan kanek.
Komandante PNTL Munisípiu Lautem, Superintendente polísia, Antonio Rego Fernandes, relata, tuda malu ne’ebé mosu iha loron sábadu (28/10) tuku lima ho balun (17:30), durante prosesu kontajen votu, tanba responsavel Sekretariadu Tékniku Administrasaun Eleitorál (STAE, sigla portugés), antes ne’e fó sai katak, kandidatu ida ho total votu 200, maibé hafoin halo kontajen daruak, total votu aumenta ba 201.
Fallansu tékniku ne’e, halo apoiantes kandidatu seluk la satisfeitu no hasai lia fuan mal hasoru apoiantes seluk hodi hamosu problema.
“Problema nia hun ne’e iha prosesu kontajen de votu. Responsavel husi STAE fó sai, total votu 200 kandidatu, maibé tuir fali dehan 201, tanba ne’e mak apoiante ida hasai lia fuan mal hodi rezulta tuda malu”, komandante PNTL Munisípiu Lautém, relata.
Vítima na’in 2 ne’ebé hetan kanek, membru PNTL lori kedas ba sentru saúde hodi hetan tratamentu.
“Vítima na’in 2, Mario Henrique (25) no Julito Henrigue (27) hetan kanek kmaan. Iha tempu ne’ebá polísia lori kedan ba sentru saúde hodi halo tratamentu, no fila kedas ba nia uma” nia dehan.
Suspeitu na’in 3, CDC ho tinan 28, DJDR ho tinan 29 no AC ho tinan 33, ne’ebé polísia deskonfia sai autór ba konfrontu refere, membru PNTL lori imediata ba kuartél munisípiu hodi halo prosesu identifikasaun.
hafoin identifikasaun polísia liberta kedas suspeitu na’in 3 hodi fila hikas nia uma no hein prosesu tuir mai.
Reportajen : Ekipa Lautem post
Editor : Black Angel
