Lospalos: Laiha ona espasu ba rai dokumentus, Diresaun munisipal servisu registu notariado munisipiu Lautém utiliza haris fatin ne’ebe la uza ona sai fatin arkiva dokumentus.
Diretur municipal koncervatoriu servisu registu notariadu Amandio Alves Gomes informa edifisiu notariadu Lautém dadaun ne’e laiha ona espasu atu rai dokumentus, tamba ne’e nia parte utiliza haris fatin ne’ebe la uza ona sai fatin arkivu hodi rai dokumentus notariadu.
“Edifisiu registu notariadu munisipiu sira seluk hadia dadauk ona aumenta tan edifisiu foun para sira bele rai arkivu, iha espasu para funsuinariu sira tur ba mais munisipiu Lautém sei iha problema.” Dehan Amandio ba jornalista media Lautém-Post iha nia knar fatin, Kinta(09/01).
Tuir nia, antes ne’e nia parte hatoo ona proposta ba Prezidente Autoridade Munisipil(PAM) Lautém, hetan ona aseitasaun no liu ona iha prossesu votasaun iha konsellu kordenasaun municipal Lautém ba Planu Asaun Annual (PAA) 2025 nian. maibe ikus mai iha implementasaun progetu rehabilitasaun nian la inklui ho notariadu.
“Ami halao ona proposta ba prezidente autoridade bazea ba dekretu lei no 84 delegasaun territorial, katak tinan ne’e atu halo manutensaun ba edifisiu ne’e no aumenta tan sala no fatin kazamentu rezistu sivil nian. Proposta ne’e aprova ona, nia dezenu BOQ hetan ona maibe ikus mai labele hetan direitu ida ne’e.” Nia lamenta.
Nia dehan, nia parte halo ona konfirmasaun ho parte PDIM katak iha projetu PDIM hamutuk 16 mak passa ona liu husi konsellu koordenasaun municipal ba PAA 2025 nian iha tinan kotuk maibe ikus mai projetu hela 6 deit mak passa no la inklui ho projetu rehabilitasaun edifisiu servisu municipal notariadu nian.
“Sente triste ituan tamba iha prosesu votasaun progetu manutensaun iha no 1 para atu halo manutensaun iha tinan ne’e mais depois de prosesu implementasaun laiha fali.” Tenik nia.
Hatan ba ne’e Prezidente Autoridade Munisipial(PAM) Lautém Melio de Jesus konfirma katak konstrusaun edifisiu notariu munisipiu Lautém antes ne’e passa ona iha konseilhu kordesaun munisipal maibe ho volumen orsamentu ne’ebé boot liu tamba ne’e la konsege passa iha OGE 2025 liu husi program PDIM no sei tau fali iha PAA ba tinan 2025 nian.
“Foin dadauk ne’e la passa, tamba nia orsamentu boot ituan porvolta de 200 mil ital, iha konselhu kordenasaun munisipal no konseilhu kordenasaun lokal pasa ba no 1 maibe ita aprezenta ba Orsamentu Jeral do Estadu liu husi programa PDIM nian la passa maibe ita tenta nafatin tau ba iha PAA 2025 nian iha PIM (Planu Integradu Munisipal), no tenta nafatin ba ministeriu justisa para oinsa rezolve questoes ne’e liu-liu infrastutura edifisiu registu sivil nian.” katak pam ba Jornalista Media Lautém-Post iha CCLN Lautém, Sesta(10/01).
Lider maximo munisipiu Lautém ne’e rekoiñese difikuldade sira ne’ebé mak kada diresaun serbisu municipal sira hasoru inklui ho delegsaun territorial sira. Tanba ne’e nia hatete, nia parte sei kontinua esforsu hodi aprezenta ba governu central nune bele resolve difikuldade ne’e.
“Hau rasik ba ne’ebá hare rasik laiha espasu atu rai dokumentus sira, tau fali iha haris fatin maibe ita nia kondisaun mak ne’e, nudar autoridade lokal la taka matan ami sempre haree katak difikuldade kada servisu munisipal Lautém iha kada delegasaun teritorial, orgaun autonomu sira iha Lautém ne’ebé kondisoes ladiak ami rejista sempre relata ba governu central para atu bele tau atensaun.” Nia kompromete.
Entretantu tuir observasaun jornalista Media Lautem-Post nian iha terrenu dadaun ne’e edifisiu sevisu notariadu Lautém laiha ona fatin/espasu hodi rai dokumentu sira, inklui plafon hahu dodok no kuak ona hodi difikulta serbisu atendimentu públiku nian liga ho dokumentus registu sivil nian ba sidadun sira iha lautém wainhira hasoru tempu udan.
Reportagen: Veru.
Editor: Joenaca Tupa da Conçeião.
