Lospalos: Ministeriu Administradaun Estatal (MAE) liu-husi diresaun geral simplifikasaun modernizasaun administrasaun lokal atualiza dadus portal munisipal ba estrutura autoridade munisipal Lautem.
Xefe departementu simplifikasaun administrativa Aleixo Soares informa, objektivu husi aktualizasaun ne’e atu apresenta dadus ne’ebé autoridade munsipal sira aprezenta iha tinan kotuk ba diresaun nasional hodi halo kompleta liu-tan tamba dadus refere balun seidauk kompletu iha portal munisipal.
“Objektivu ohin nian atu aprezenta dadus portal nian para atu konfirma tamba dadus tinan 2024 nian ne’e husi munisipiu haruka ona ba diresaun geral desentralizasaun governu lokal, tamba dadus sira ne’e dala ruma mai atraza entaun presija halo konfirmasaun ho dadus nain sira hodi halo kompleta.” dehan sefe departementu.
Iha fatin hanesan secretariu munisipal administrasaun no financas Francisco Dos Santos haktuir, dadus munisipal tinan 2024 nian ne’e autoridade munisipal antes ne’e relata ona ba nasional maibe presija mos iha konfirmasaun entre diresaun ho autoridade munisipal sira nune’e bele halo kompleta liu hafoin publika iha portal munisipal.
“Dados ne’e hahú husi postu to’o diresaun servisu munisipal sira delegasaun territorial sira hotu iha fulan hira liu-bá kotuk ami insert hotu ona ba portal munisipal nivel nasional no ohin sira mai atu aprezenta dados ne’ebé iha ona no konfirma fali saida mak seidauk envolve iha portal munisipal.” Nia afirma.
Entretantu dadus ne’ebé autoridade munisipal Lautem aprezenta iha tinan kotuk nian ne’e mak dadus populasaun, geografia munisipal, kada postu administrativu to’o suku, dados husi kada diresaun servisu munisipal Lautem nian, no servisu sira seluk ne’ebé iha autoridade munisipal Lautem nia okos.
Jornalista: Veru
Editor: Joenaca Tupa da Conceição.
