Lospalos: Relasiona ho komemorasaun loron Restaurasaun Independensia ba dala XXII(2002-2024) ne’ebe mak sei akontese iha loron 20 fulan Maiu ne’ebe sei mai, Ministerio dos Comersiu industria(MCI) organiza eventu feira Produtu lokal durante Loron 3 iha munisipiu Lautém hodi promove produtu ne’ebe produs husi mikro pequena no medio empreza sira iha Munisipiu Lautém.
Alende atividade expozisaun ba produtu lokal sira, iha Feira ne’e mos sei loke espasu ba kreativdade foinsae sira nian liu husi aprezentasaun dansa cultural, konsertu muzikal, kompetisaun diskursu Públiku no desportu hodi ense atividade feira ne’ebe hahu loke husi loron 19 to’o loron 21 fulan Abril ne’ebe realize iha kampu 28 de Novembro Munisipiu Lautém ne’e.
Ministerio dos Comersiu industria(MCI) Filipus Nino Perreira informa, objektivu husi feira ne’e, sai mos oportunidade ida ba promosaun no divulgasaun produtu inovativu sira ne’ebe timoroan sira produs liu husi atividade micro peqenas no medio emprezas hodi bele tranforma ba atividade indutria inovativu.
“Objektivu prinsipal mak atu promove produtu ne’ebe mak produs husi micro peqena no medio empreza sira. Ida ne’e hanesan meios ne’ebe ita iha, atu bele fó espasu ba ita nia micro peqenas no medio emprezas atu bele demostra sira nia produtu, bele dezenvolve sira nia koneksaun ho merkadu no bele fasilita sira nia produtu ba consumidores sira”. Dehan nia ba Lautém-Post iha sesta(19/04).
Governante ne’e relata liu husi feira ne’e, Politika nonu governu nian mak atu halo promosaun no divulgasaun ba produtu lokal sira hodi hare mos ba potensialidade ne’ebe iha, oinsa mos bele transforma produtu iha valor akresentadu liu husi industria tranformadores ne’ebe maka inovativu.
“esperansa katak produtu sira ne’e bele sai hanesan fontes rendimentu ida ba micro pequena no medio empreza sira, nune’e sira bele iha duni, hodi kontinua kontribui nafatin ba ekonomia ne’ebe rezilente iha ambitu sustentabilidade nian”. tenik guvernante ne’e
Iha sorin seluk Secretariu Munisipal Assuntu Administrasaun no Financas, Francisco Dos Santos agradese ba nonu governu tamba bele loke ona feira ne’e. Nune’e komunidade sira bele promove produtu lokal ne’ebe sira iha, iha munisipiu Lautém.
“Feira kalan ida ne’e ho tema promove produtu lokal, signifika katak governu ida ne’e hakarak duni promove ninia emar sira iha sira nia kreatividade. Liu husi meios hanesan ita bot sira prontu mai hodi hatudu ba ema hotu katak kreatividade mak ne’e saida mak ami bele halo ba munisipiu Lautém mak ida ne’e.” katak Secretariu Munisipal ne’e.
Francisco kompromete Autoridade Munisipiu Lautém laiha rezerva atu apoiu programa hotu-hotu husi ministeriu ne’ebe deit ne’ebe mak implementa iha munisipiu Lautém.
“Ami prontu kolabora, saida mak ami bele kontribui hodi fo susesu ba programa sira. Laiha rezerva atu apoiu programa saida deit husi ministeriu ne’ebe deit, ne’ebe hakarak mai implementa iha munisipiu ida ne’e.” nia afirma
Reportagen: Veru
Editor: Joenaca Tupa da conçeião.
