Lospalos: Menus profesór atu hanorin, estudante aula tolu iha Ensinu Baziku Filial(EBF) Keri Laran Sabalae, ne’ebé lokaliza iha aldeia Iralafai, suku Bauro, postu administrativu Lospalos, abandonadu durante tinan rua ona.
Koordenadóra EBF Kerilaran Sabalae Mariazinha Dos Santos, informa, durante tinan rua ona EBF Kerilaran Sabalae laiha profesór atu hanorin estudante sira, liuliu klase 1°, 5° no 6 ano, tanba ne’e obriga profesór sira fahe oras ho klase sira seluk nune’e klase tolu refere bele tuir prosesu aprendizajen.
“Durante besik tinan rua ona problema ami enfrenta mak menus profesór, ne’ebé aula balun ami abandona hela, husi klase 1°, 5° no 6° tanba profesór laiha. ne’ebé ami presiza profesór na’in tolu”. Katak nia ba jornalista Lautem Post iha nia knaar fatin foin lalais ne’e.
Koordenadóra EBF Keri laran Sabale ne’e esplika, Prosesu hanorin ami fahe oras, 1° ano hahú husi oras 8:00 to’o 10:00 kontinua hanorin 6°ano, ba 5° ano profesór na’in rua mak fahe oras hodi hanorin.
Ligadu ho preokupasaun ne’e, nia hatutan, parte eskola mós relata beibeik ona ba servisu Munisipal edukasaun munisípiu Lautem maibé to’o ohin loron seidauk hetan resposta.
” Ami hato’o dala barak ona, liu husi eskrita mós ami hato’o iha oral mós ita hato’o maibé to’o agora seidauk koloka profesór mai.” Nia lamenta.
Relasiona ho preokupasaun ne’e, reprezentante diretur Serbisk Municipal edukasaun munisípiu Lautem, João Apariçio Capelão, konfirma, servisu edukasaun munisipál Lautem durante ne’e kontinua relata problema edukasaun nian ba ministériu edukasaun atu buka meius hodi rezolve jestaun hirak ne’e.
Tuir nia dadaun ne’e mós ministériu edukasaun hahú hala’o ona rekrutamentu hodi fó teste ba kandidatu profesór sira liu husi etapa por etapa, atu nune’e bele responde ba problema profesór sira nian ne’ebé mak sei menus iha nivel territóriu nasionál.
” Gestaun profesór, ami husi edukasaun ami sempre alista profesór sira ne’ebé ke menus iha edukasaun pre eskolár, ensinu báziku, ba tékniku vokasionál no sekundáriu hodi hato’o ba ita-nia ministériu edukasaun.” Dehan nia ba Jornalista Lautem Post.
Reprezentante diretur serbisu munisipál edukasaun Munisipiu Lautem ne’e afirma, ministériu edukasaun kontinua esforsu hela hodi halo rekrutamentu ita kandidatu profesór sira iha territóriu tomak.
“Primeira etapa to’o terseira etapa foin daudauk la’o ona, ita hein nia kolokasaun”, nia subliña tan.
Entretantu dadaun ne’e totál profesór iha Ensinu Baziku Filial Keri Laran Sabalae Iralafai hamutuk ema na’in 4 inklui mós ho koordenadór, no estudante sira hamutuk ema na’in 243.
Jornalista: Veru
Editór: Joenaca Tupa da Conceição.
