Lospalos: Iha tinan ida-ne’e Governu liuhusi Ministeriu Asuntu Kombatentes Libertasaun Nasional (MAKLN) sei atribui bolsa estudu hamutuk 100 ba Kombatentes no martires nia oan sira iha munisípiu Lautem.
Sekretariu Ezekutivu Konsellu Munisipiu Kombatentes Libertasaun Nasional (CMCLN sigla portugés) Acasio Fini Ponta Leste hatete, tinan ida-ne’e, MKLN fó oportunidade ba estudante sira hamutuk atus ida (100) atu asesu ba bolsu estudu, espesialmente ba kombatentes no martires ne’ebé hetan ona pensaun nia oan iha munisípiu Lautem.
Nia esplika, katak husi númeru totál ne’e kompostu husi estudante sira hahú husi nivel ensinu báziku, Pre-sekundariu, sekundariu too nivel universitáriu inklui mós ho estudante universitáriu sira ne’ebé daudaun ne’e hala’o hela estudu iha rai liur.
“Tinan ida-ne’e MKLN atribui ona programa bolsu estudu ba kombatente ho martires sira-nia oan ne’ebé hetan ona pensaun, ne’ebé ba tinan ne’e iha ema na’in 100 sei asesu. Kompostu husi SD (Ensinu Primariu) ema na’in 5, SMP (Ensinu pre-sekundáriu) ema na’in 15, SMA (Ensinu Sekundariu) na’in 25, universidade rai laran 50 no rai liu na’in 5.” Esplika nia ba Jornalista Lautem-Post iha nia fatin foin lalais ne’e.
Sekretariu ne’e afirma, katak estudante sira ne’ebé bainhira liu tiha ona selesaun no asesu ba rejime ne’e mak MKLN no Konsellu sei akompaña nafatin no apoiu subsídiu ba sira tuir sira-nia grau ensinu.
Maibé ba subsídiu ne’ebé MCLN fó apoiu ne’e, nia hetete, kada tinan bainhira estudante ne’ebé iha valór la prense kriteriu mak tinan oin estudante ne’e sei la asesu tan.
“Estudante sira ne’ebé hetan subsídiu husi MCLN ba tinan ida husi SD (Ensinu primariu) husi klase 1 to’o 5 hamutuk $ 300.00 kada tinan, SMP (Ensinu Pre-Sekundariu) $ 600.00, SMA (Ensinu Sekundariu) $650.00, universidade rai laran $ 1,000 no universidade rai li’ur $ 2.000.00.” Nia esplika.
Maibe, MCLN no Konsellu sei kontinua halo akompanamentu ba estudante sira ne’ebé asesu ba bolsu estudu ne’e bainhira valór la diak Konsellu sei hapara subsídiu no sei la asesu ba tinan tuir mai.
“MKLN ho Konsellu tenke akompaña sira-nia situasaun, maibé sira-nia valór la di’ak, pasénsia tinan oin nia la asesu tanba valór la di’ak.” Nia sublina.
Entretantu CMCLN munisípiu Lautem, simu ona rejistu ba estudante sira no sei remata iha loron 22 fulan Abril tinan ida ne’e.
Kriteriu asesu ba rejime atribuisaun bolsu estudu:
– Priense formatu husi MCLN.
– Karta eleitoral (copia).
– Billeti identidade B.I (copia).
– Sertidaun RDTL (orijinal).
– Sertidaun batizmu (orijinal).
– Deklarasaun matríkula tinan 2025 (kopia).
– Valor eskola tinan 2024 (kopia).
– Konta bankária (kopia).
Jornalista: Veru
Editor: Joenaca Tupa da Conceicao.
