Lospalos: Organizasaun Naun Governamentál (sigla portugés, ONG) lokál no nasionál nia koordenasaun servisu, bele serbí povu ho di’ak, tanba liu husi enkontru koordenasaun entre ONG bele fahe servisu ba malu.
Diretór servisu municipal apoiu ONG no organizasaun komunitária, Jose da Costa Monteiro, hateten, Diresaun Servisu Municipal hala’o knar hodi halo baze dados ba ONG nia servisu no atividade.
“NGO sira ne’ebé iha munisípiu Lautém presiza tau iha baze de dados, tanba nee liu husi enkontru re-kordenasaun hodi hametin liu tan kordenasaun no parseria entre NGO lokál, nasionál no internasionál hodi serbí povu nia moris di’ak” dehan nia, Segunda, (02/10/)
Durante enkontru, kada sosiedade sivíl aprezenta nia atividade ne’ebé durante ne’e hala’o, nune’e kria mapeamentu hodi fasilita atividade ONG sira iha terrenu.
“Presiza halo mapeamentu ba sira nia serbisu nune’e karik iha NGO tama munisípiu Lautém karik ho atividade ne’ebé hanesan rekomenda ba fatin seluk”, nia esplika.
Benefísiu husi ONG sira nia koordenasaun servisu maka NGO Prosprek halo konservasaun ba lenuk lubuk ida iha tasi Com.
Programa manager NGO Fundamor, Rita Colisia Mar Fernandes, haktuir, enkontru regular halo iha kada tinan hodi aprezenta informasaun husi kada NGO.
“Kada tinan NGO hato’o nia fundus ne’e mai husi (fontes) husi ne’ebé, obstákulu ne’ebé sosiedade sivíl enfrenta iha faze implementasaun”, dehan nia.
Rezultadu servisu husi NGO Fundamor hatudu katak tinan kotuk konstrui ona eskola ne’ebé hetan apoiu husi funsaun Asia no seluk tan.
“Fundamor tinan kotuk konstrusaun eskola EBC Leusari, fundos husi embaixada Japaun hamutuk dolar $ 90.967 (rihun sia-nulu, atus sia, neen-nulu, resin-hitu), tinan ne’e dezenvolvimentu rurál fundus husi UNDP hamutuk $24. 500. (rihun rua-nulu-resin-hat, atus-lima), survey tatoli programa bolsu da mãe jerasaun foun, fundus husi Asean fundation ho total $15.000 (rihun, sanulu-resin-lima), programa auditoria sosiál, fundus husi SASCAS (apoiu governu ba sosiedade sivíl) hamutuk $20.000 (rihun rua-nulu) implementa iha postu Tutuala no Lospalos”, nia relata.
koordenadór terrenu ONG Ba Futuru, Bernandino Marques Marvão, afirma, NGO ba futuru nia iha atividade 5 ne’ebé foka ba kapasitasaun joven iha suku 7 ne’ebé pertense iha postu administrativu Losplaos.
“Iha programa 5 ne’ebé aprende mak rezolusaun konflitu, lideransa, life skill, haforsa ekonomia, Teatru no dezenvolve senáriu. Suku 7 iha postu Lospalos mak Cacavei, Leuro, Soru, Bauro, Raça, Home, ho total partisipante 66” nia afirma.
Entretantu, ONG ne’ebé eziste iha munisípiu Lautém hamutuk 23, kompostu husi ONG Lokál 12 no nasionál 11.
Reportajen : Veru Fernandez.
Editor : Black Angel
