LOSPALOS: Prezidente Autoridade Munisipál Lautém, Mélio de Jesus, akompaña ho estrutura, partisipa enkontru kona-bá progressu Ezekusaun Orsamentu Kapitál Dezenvolvimentu nian, no aprezenta proposra orsamentu ba popupansa iha kapital dezenvolvimentu hodi hala’o konstrusaun ba Uma-Adat Lê JIAVAL iha Munisípiu Lautém.
Tuir nota ne’ebé Lautem Post asesu katak, diskusaun ne’e organiza husi Ministériu Administrasaun Estatál, iha ámbitu enkontru, kada Prezidente Autoridade Munisipál, aprezenta programa no planu ba dezenvolvimentu Munisipál nian ne’ebé maka implementa ona.
Enkuantu enkontru ne’e hetan abertura husi Ministru Administração Estatal no lidera husi Diretor Jerál Dezentralizasaun Governu Lokál, António Agosto Guteres, ne’ebé hala’o iha Salaun Grupu Média Nasionál (GMN), Bebora, Díli.
Durante iha enkontru, Prezidente Autoridade Munisipál Lautém, aprezenta projetu ne’ebé agora la’o hela iha Munisípiu Lautém, hamutuk 15, no projetu 14 mak agora atividade obra la’o ona, no projetu ida maka agora sei prosesu iha Aprovizionamentu.
Nune’e mós aprezenta ezekusaun orsamentu iha Munisípiu Lautém, daudaun ne’e atinje ona 21,37 porsentu
Tanba ne’e, Autoridade Munisipál Lautém husu Ministru Administrasau Estatál, atu aprova pedidu foun, atu nune’e osan ne’e ba poupansa projetu rua mak hanesan, Konstrusaun foun Sede Aldeia 6 iha Suku 3, Muapitine, Fuiloro no Souro inklui konstrusaun Uma Adat Lê JIAVAL Lospalos Vila, Jardim, Morru Haleu no Parkiran estasionamentu ba transporte públiku no privada sira.
Nia salienta tan, akordu ne’ebé semana kotuk asina, kompeténsia entrega ona ba iha PNDS Munisípiu, maibé implementa iha tinan 2025, ne’ebé to’o agora PNDS sei iha PNDS Nasional, tanba enjeñeiru ba iha rekrutamentu funsionáriu PNDS ne’ebé tuir lolos nia kontratu remata ona 30 Jullu.
Maibé sei kontinua, Autoridade Munisipal sira la hatene, maski Autoridade Munisipál protesta nafatin PNDS iha Nasionál, nune’e bele informa situasaun sira ne’e ba Autoridade Munisípiu sira, maibé to’o agora laiha informasaun.
Iha fatin hanesan, Ministru Administração Estatál,Tomás do Rosário Cabral, hateten enkontru ida ne’e, hafoin iha reuniaun Konsellu Ministru kona-ba preparativu ba orsamentu 2025, ne’ebé ko’alia kona-ba kapitál dezenvolvimentu ba Munisípiu sira, tanba Munisípiu sira agora iha podér Administrativa no podér finanseiru, mak ezekusaun sira sei la mai Governu Central, maibé sira nia ezekusaun sei diretamente ba iha Sistema Bancu Central no Ministério Finanças.
Tanba ida ne’e, enkontru ne’e loron tomak ho Prezidente Autoridade Munisipál ho estrutura sira, hodi haree filafali ba ezekusaun Orsamentu 2024 nian, no preparativus ba orsamentu 2025 nian, tanba Governu deside orsamentu rihun $500 mai kraik sei entrega hotu ba iha Munisípiu sira, liuliu atu atende iha área eskola, sentru saúde, Agrikultura, Merkadu no Saneamentu ho Administrasaun.
Governante ne’e hateten, daudaun orsamentu ne’ebé maka ba iha Munisípiu boot liu Miliaun resin, ba iha fundus infraestrutura, tanba ida ne’ebé Ministeriu Administração Estatal, bolu Prezidente Autoridade sira ho estrutura, atu reajusta fali orsamentu sira bazeia ba sira kondisaun ne’ebé iha tereñu, hanesan ema ho vulneravel no sira seluk.
Ministru Administrção Estatál, subliña, ba Diretor Jerál no Diretór Munisipál sira, ne’ebé maka iha ligasaun servisu Munisipál, tenke fó asisténsia tékniku sira, inklui programa PNDS ne’ebé maka iha tereñu sei rezolve barak.
EKIPA LAUTEM POST
