Lospalos: Prezidente Autoridade munisipál (PAM sigla postugues) ho administradór postu 6 inklui diretór servisu munisipál Lautém simu pose husi vise ministro Administrasaun Estatál ( MAE) iha munisípiu Lautém.
Vise-ministru Administrasaun Estatál, Jacinto Rigoberto de Deus, husu ba prezidente autoridade munisipál Lautém hamutuk ho nia estrutura, atu servisu hamutuk ho entidade sira hotu hodi fortalese poder lokál.
“Tenke halo preparasaun hodi implementa preparasaun prinsípiu desentralizasaun ho ekilibriu”, dehan nia.
Governante ne’e husu ba prezidente autoridade munisipál ho estrutura hodi servisu tuir ierarkia.
Iha podér lokál munisipiu Lautém ne’e, entidades sira idak-idak halo nia knaar ka kompeténsia husi prezidente autoridade too ba órgaun suku iha aldeias.
“Iha sentidu ne’e fundamentál tebes ba autór sosiál no polítika sira hotu, tenke envolve an no partsipa iha assembleia dos postos administrativu konsellu de kordenasaun munisipál konsellu”, governante ne’e orienta.
Prezidente Autoridade munisipál Lautém, Melio de Jesus, kompromete, loke kampu servisu no hasa’e poténsia produtu agríkula, turismu no indústria iha Lautém.
“Ha’u mai iha ne’e ho slogan ka simbolu ida katak ‘Lautem hader’, Lautém hadeer husi ekonomia, hadeer husi infrastutura edukasaun saúde, agrikultura, Turizmu industria no seluk tan”, Melio promete.
Prezidente autoridade munisipál Lautém Sesante, Domingos Savio, hateten, durante nia mandatu tinan 3 servisu balun maka nia konsege finaliza, no balun la halo tamba laiha orsamentu,.
Domingos relata, iha nia mandatu servisu, konstrui edifísiu ba funsionariu, edifísiu administrasaun postu Lore, Rehabilitasaun rezidensia PAM Lautém, moru protesaun Administrasaun, ateru estrada liga husi Lautem mai Lospalos no programa balun iha ona planu maibe la konsege realiza tamba la pasa iha nia proposta ne’ebé lori ba nasionál.
Enkuantu, hafoin tomada de pose PAM sesante asina termu entrege patrimonio estado ba PAM atual.
Reporter: Veru.
Editor : B.A
