Lospalos: Komando Policia Nasional Timor Leste (PNTL) munisípiu Lautem liu husi ekipa tránzitu rodaviariu, prenda ona motór hamutuk 4 ne’ebé ema deskoñesidu subar iha aldeia Motara suku Bauro, postu administrativu Lospalos, munisípiu Lautem.
Komandante PNTL munisípiu Lautem superintendente João da Costa, informa, ligadu ho akontesimentu motór lakon iha munisípiu Lautem ne’e nia parte prende ona motór hamutuk unidade 4 ne’ebé mak ema deskoñesidu subar iha aldeia Motara, suku Bauro.
Komandante Polisia Minisipiu Lautem ne’e konta tuir, hafoin polísia simu informasaun husi komunidade, nia parte buka tuir motór hirak ne’e to’o hetan iha aldeia Motara, suku Bauro no dadaun ne’e asegura ona iha komando PNTL munisípiu Lautem.
“Konaba motorizada komunidade nian ne’ebé lakon polísia hetan informasaun husi fontes balun, polísia buka tuir to’o hetan iha aldeia Motara, suku Bauro,” Haktuir Komandante PNTL munisípiu Lautem ne’e ba Jornalista Lautem Post.
“Sira rai motór tolu iha toos. to’o iha ne’ebá evidénsia sira la hetan, tuir informasaun katak motór sira lori sai halo atividade iha suku Home no prende iha ne’ebá lori mai komandu munisípiu hodi halo prosesu”. Nia hatutan tan.
Komandante Munisipiu ne’e konfirma, liu husi rezultadu prosesu identifikasaun ne’ebé parte PNTL halo, nia hateten, PNTL konsidera motór hirak ne’e na’ok tanba suspeitu sira la aprezenta dokumentus legais. Tanba ne’e motorizada refere polísia asegura ona hodi prosesa tuir lei ne’ebé iha.
” Iha prosesu identifikasaun ba motór 3 durante loron 2, motór ne’e sira nian ka, ou motór ne’e ema seluk nian mak sira ba rai iha ne’ebá.” Nia afirma.
“Iha identifikasaun, sira ne’ebé lori motór la aprezenta dokumentus legál ba polísia. signifika ami deskonfia katak motór ne’e sira na’ok ema seluk nian mak ba rai iha ne’ebá. Ho ida ne’e polísia foti hodi halo identifikasaun motór rai iha polísia hodi submete tuir lei ne’ebé iha.” Katak komandante ne’e.
Relasiona ho motorizada hamutuk unidade 4 ne’ebé dadaun ne’e parte PNTL asegura iha komando PNTL munisípiu Lautem, komandante PNTL ne’e husu ba komunidade sira ne’ebé mak sente motór lakon, bele lori dokumentus legais motór nian nune’e bele foti fali nia motór ne’ebé mak dadaun ne’e iha ona komandu PNTL Munisipiu Lautem.
“Komunidade ne’ebé nia motór lakon, sira rona bele lori motór nia dokumentus mai tuir númeru ne’ebé iha, tuir númeru sasis nian no STNK kuandu apár ho motór ne’e bele entrega ba nia na’in”. Nia informa.
Tuir informasaun ne’ebé jornalista Lautem Post asesu, motorizada hirak ne’e parte polísia deskobre iha área Sinapala baliza entre aldeia Nanafoe no sub- aldeia Motora, suku Bauro nian ne’ebé deskonfia autór hirak ne’e mai husi suku seluk.
“Autór hirak ne’e la’ós husi suku Bauro nian, la’ós husi Motara nem husi Nanafoe nian. Deskonfia sira Mai husi suku seluk. Fatin ne’ebé Polisia hetan motór 4 ne’e iha área Sina Pala baliza entre Motara ho Nanafoe nian, iha dut luan ne’ebá no sira subar hela toos komunidade sira nian “, informa komunidade Motara ne’ebé lakohi atu fó sai nia identidade ne’e ba Jornalista Lautem Post.
Entretantu kona-ba kontinuasaun husi kazu motorizada lakon iha munisípiu Lautem ne’e, dadaun ne’e sei iha hela prosesu identifikasaun husi parte komando PNTL munisípiu Lautem.
Alende ne’e, motorizada hamutuk unidade 4 ne’ebé dadaun ne’e parte komando PNTL munisípiu Lautem asegura ona mak hanesan motorizada ho marka Mio hamutuk unidade 3, ho nia sapa matríkula Y. 6614, S. 0399 no H. 5776, inklui mós motorizada ho marka Vixon lama unidade 1 ho nia sapa matríkula I. 6991.
Enkuantu motór ho marka Mio hamutuk 3 ne’e lakon iha fulan juñu tinan ne’e nia laran no motór ho marka Vixon lama lakon iha tinan 2018.
Jornalista: Veru.
Editór: Joenaca Tupa da Conçeião.
