Lospalos: Husi totál Projetu Servisu Munisipal Planeamentu Integradu No Dezenvolvimentu (SMPID/PDIM) hamutuk 16 iha tinan 2024 ba munisípiu Lautem, projetu 12 konsege remata ona servisu maibé iha projetu 4 maka servisu la tuir termu asina kontratu.
Tanba ne’e autoridade munisipál Lautem sei fó sansaun administrativu ba kompañia sira ne’ebé mak serbisu ho malandru no la tuir termu kontratu ne’ebé iha.
Prezidente Autoridade Munisipal (PAM) Lautem Melio dé jesus konfirma, sei blacklist kompañia sira ne’ebé mak hala’o serbisu la tuir termu kontratu serbisu ne’ebé iha, no ba oin sei la fó tan oportunidade atu kompete tan ba projetu kapitál dezenvolvimentu iha tinan oin mai.
Husi totál projetu PDIM 4 ne’ebé dadaun ne’e seidauk finaliza nia serbisu tuir termu kontratu, mak hanesan projetu konstrusaun edifísiu DNTT Lautem, konstrusaun uma adat Le-jiaval, konstrusaun uma antigu karpintaria Caiwaca, no konstrusaun sala de aula EBC Leusari.
Liga ho ne’e, autoridade másimu Lautem ne’e haktuir, antes ne’e laiha lei atu regula hodi hapara kompañia sira ne’ebé mak serbisu la tuir kontratu serbisu.
Maibé, nia hatete, nia parte hahú estabelese ona rejime, katak bainhira kompañia sira ne’ebé mak hala’o serbisu ho mangame mak autoridade Lautem sei hapara nia serbisu hodi troka fali ho kompañia seluk.
“Kompanha ne’ebé mangame ita sei fó sansaun administrativa, karik aban bain rua sira mai fali kompete ba projetu kapitál dezenvolvimentu, sei hare sira nia atitude ne’ebé iha. Mezmu prienxe hela kritéria maibé sai ona lisaun ba autoridade atu labele fó tan kontratu ba sira.” Afirma PAM Lautem, Melio de Jesus ba jornalista Lautem Post.
Nia esplika, ita laiha lei ida atu regula ba kompañia sira ne’ebé kaer projetu mak mangame uitoan ita bele hapara kontratu no troka, atu kompañia seluk mai troka.
“Rezime espesiál ba projetu PDIM nian laiha, tanba ne’e iha ona ezaminasaun lei sistema aprovizionamentu kontratu públiku. Ami sujere ona, tau ona kona-ba similar projek ho penalti ba kompañia ne’ebé que malandru uitoan.” Nia subliña.
Bainhira kompañia sira ne’ebé servisu la tuir termus asina kontratu, autoridade Lautem sei fó sansaun, no penalidade ba kompañia refere atu la tuir tan projetu ne’ebé atu implementa iha Lautem.
Entretantu Projectu PDIM 4 ne’ebé seidauk finaliza maka reabilitasaun uma karpintaria antigu, konstrusaun edifísiu DNTT, konstrusaun uma adat Le-jeiaval, no konstrusaun sala dé aula iha EBC Leusari.
Husi totál projetu 16 ne’ebé kompostu husi projetu konstrusaun ponte Bemoris, konstrusaun ba kampu multifunsaun, uma adat Le-jeiaval, uma antigu karpintaria, dada bee mós iha Luro, konstrusaun sala dé aula iha EBC Leusari, sala dé aula iha EBF Culuhun Lospalos, sala dé aula iha EBF ligidiga.
Nomos konstrusaun ponte Tei nara, kanalizasaun bee mós iha Lore, parajen karreta iha edifisiu administrasaun Lautem, konstrusaun armazén STAE, edifísiu DNTT, Mortuario, uma unidade barak iha Luro no postu saúde Naisalopu Iliomar.
“Iha tinan kotuk iha projetu 16 mak ita loke, dadaun ne’e projetu 10 tama ona faze retensaun, balun retensaun ita selu hotu ona. Foin dadaun ita extende tan kontratu mak STAE ne’e mós hotu ona, tama ona faze retensaun hela de’it 4 maka seidauk ida mak DNTT, eskola iha Leusariu, uma antiga Caiwaca ho uma adat Le-jiaval.” Nia hakotu.
Jornalista: Veru
Editór: Joenaca Tupa da Conceição
