Lospalos-Sekretáriu Estadu Arte no Kultura (SEAK) realiza formasaun muzika “toka violinu” ba joven talentu sira suku Fuiloru, Postu Administrativu Lospalos, Munisípiu Lautém.
Biban ne’e, Xefe Departamentu ba promove muzika tradisionál iha SEAK, Yohanes Berevria, hateten objetivu prinsipál hosi formasaun múzika ka toka violinu ba joven talentu sira atu hasa’e konesimentu hodi konserva no promove muzika tradisionál iha Timor-Leste.
“Ita halo formasaun muzika iha área toka violinu hodi aumenta labarik sira nia talentu hodi sai tokadór violinu nian. Labarik sira ne’ebé benefisiáriu ba formasaun ne’e ho idade tinan-hitu ba leten. Ita halo formasaun ne’e ho hanoin ida atu loke mós kompetisaun muzika tradisionál liuliu toka violinu”, dehan Xefe Departamentu ne’e ba Lautem-Post, kuarta ne’e.
SEAK prepera ona formadór atu kontinua formasaun ba labarik sira kona-ba muzika no halo prátika toka Violinu,Viola, tanbor no seluk-tan hodi hasa’e konesimentu atu sai tokadór ida ne’ebe iha mentalidade di’ak no profisionál.
Nia haktuir, Tuir loloos formasaun ne’e hala’o durante loron 5, maibé tanba ho realizasaun eleisaun komunitáriu ka xefe suku iha loron 28 outubru 2023, nune’e habadak formasaun ba durante loron tolu.
Reportajen : Sozinho(Lore One).
Editór : Helefatil
