Tutuala: Antes ne’e, rusa no animal fuik seluk iha illeu jaco pertense ba parke nasionál Nino Conis santa, la konsumu bee moos tanba bailoron rejulta bee maran.
Tanba ne’e, Sekretáriu Estadu das Floresta no Sekretáriu do Estadu Eletrisidade, Agua no Saneamentu , fornese bee moos ba rusa iha illeu Jaco hodi konsumu.
Sekretáriu de Estadu Floresta, Fernadino Vieira da Costa, hateten, governu tenke proteje animal fuik iha parke nasionál Nino Konis Santana liu husi fornesimentu bee moos.
“Rusa illeu Jaco (parke nasionál Nino Conis Santana) ne’e governu nia obrigasaun atu proteje. Tanba ne’e mai diretamente hare rasik.
Agora daudaun ita nia rusak krekas. Ita kontinua nafatin fornese bee ba tanke iha Jaco”, dehan nia, iha Tutuala, Kinfa, (30/09/)
Governante ne’e dehan, sei halo konservasaun sítiu, sai fatin ida hodi muda rusa bainhira kuantidade rusa aumenta.
Além de ne’e, fatin konservasau ne’e mós sai fatin atu akumula animal fuik ne’ebé moras hodi halo tratamentu.
“Konservasaun sítiu ne’ebé sei halo iha área parke nasionál iha suku Mehara, nune’e rusa ne’ebé kondisaun ladún di’ak bele muda ba fatin ne’ebé prepara. Kuandu ai-han laiha, tenke fornese ai-han no halo tratamentu ba rusa ne’ebé moras depois ba husik fali iha Jaco nia planeia.
sekretáriu estadu ne’e mós husu ba komunidade labele kasa animal fuik maibé tenke proteje nune’e hafurak illeu Jaco, tanba animal fuik mós nudár riku-soin ida ba timoroan.
Iha fatin hanesan Sekretáriu Estadu Eletrisidade, Bee no Saneamentu (SEEAS, sigla portugés), Santos Noronha, dehan, governu sei aplika métodu tolu hodi proteje animal fuik iha Jaco.
“Aplika métodu tolu; rezervatóriu udan-been, identifika bee matan iha Jaco, no identifika bee matan iha Valu (tasi ibun Jaco) hodi kanaliza mai”, dehan nia.
Daudaun ne’e iha rezervatóriu 6, kada tanke kontém litru 2.000, maibé governante ne’e dehan, bee sei la sufusisente bainhira akontese bailoron naruk tanba ne’e, presiza aumenta rezervatóriu 5.
“Entaun total bee, iha litru rihun 12 (12.000 ltr) baibain sufisiente, maibé kuandu bain loron naruk bee la too presiza aumenta rezervatóriu 5 para kobre ba tinan ida”, nia dehan.
Tuir dadus husi tékniku floresta iha postu administrativu Tutuala, kuantidade rusa iha Jaco hamutuk 400.
Reportajen: Veru Fernandes.
Editor : Black Angel
