Lospalos: Governu liu husi Servisu Munisipál Ageikultura (SMA,sigla Portugés) iha ona planu atu konstrui barajen ka morru protesaun ba natar iha Sabalio, Munisípiu Lautém, hodi fasilita komunidade sira halo produsaun ba hare.
Governu munisipál halo planu ne’e relasiona ho problema natar ektare tolu ne’ebé hetan estragu, foin lalais ne’e, bainhira udan boot provoka korrente bee mota maka’as.
Diretór Servisu Agrikultura Munisípiu Lautem, Albertino Zeronimo, informa governu iha ona planu atu konstrui morru protesaun ba komunidade nia natar ne’ebé hetan estragu husi korente mota.
“Agrikultór sira husi parte norte ne’e alende udan been la too kuando udan monu rai ita tenke hare sira tanba sira nia natar afetadu ba erosaun. Nune’e intervensaun ne’ebé ita atu halo mak hare ba área ne’ebé mak besik mota tenke halo barajen ka morru protesaun atu asegura natar hirak ne’e,” Diretór ne’e hateten ba Lautém Post, iha kna’ar fatin-Lospalos, ohin.
Diretór ne’e hatutan nia parte mòs sei identifikasaun ba
fatin hodi konserva bee, nune’e fornese ba komunidade nia natar bainhira iha tempu bailoron naruk.
“Ita mós halo identifikasaun fatin ka área balun hodi halo koservasaun bee la’ós boot liu, maibé mais ou menus ho medida mediu oituan para fururu bainloron naruk ita bele utiliza bee sira ne’e hodi sustenta ba agrikultór sira nia natar no ai-horis sira bele moris ho di’ak,” nia promete.
Reportegen:Veru
Editór: Helefatil
