LOSPALOS- Governu liuhusi Konsellu Ministru, ohin, hala’o sorumutu iha Palásiu Governu, Dili no dekreta Lutu Nasionál iha territóriu Repúblika Demokrátika Timor-Leste tomak, nu’udar sinál tristeza ba Sua Santidade, Papa Francisco nia mate.
Períodu Lutu Nasionál hahú iha tuku 10 dadeer iha loron 22 fulan-Abríl no ramata iha meianoite iha loron 28 fulan-Abríl.
Durante períodu Lutu Nasionál, Bandeira Nasionál tenke hasa’e to’o klaran de’it iha edifísiu públiku hotu-hotu, inklui embaixada, konsuladu no reprezentasaun sira seluk Estadu nian iha estranjeiru, no mós iha ró sira Estadu nian.
Sua Santidade Papa Francisco mate iha loron 21 fulan-Abríl tinan 2025, tuku 7:35 dadeer iha nia rezidénsia, iha Sidade Vatikanu.
Governu rekoñese katak “hanesan devér Estadu nian, lori povu timoroan nia naran, hatudu sentidu gratidaun no rekoñesimentu ne’ebé boot, hodi presta omenajen ida ne’ebé merese ba Lider boot Igreja Katólika nian”.
Iha komunikadu ne’ebé fó-sai horisehik, loron 21 fulan-abríl, Governu, hodi nia naran rasik no hodi povu timoroan nia naran, hato’o “sentidas kondolénsias ba Igreja Katólika, ba Koléjiu Kardeál sira-nian, ba povu Arjentinu no ba sarani sira hotu iha mundu tomak,” ba “Sua Santidade Papa Francisco ninia mate, lider espirituál ida ne’ebé ho influénsia boot tebetebes ba umanidade, defensór ne’ebé lakole ba sira ne’ebé vulneravel liu no promotór dame, justisa no fraternidade nian entre povu sira.”
Ho laran triste tebes no sentimentu ne’ebé kle’an, bainhira Timor-Leste simu notísia kona-ba Sua Santidade Papa Francisco nia mate, lider espirituál ida ne’ebé ho influénsia boot tebetebes ba umanidade, defensór ne’ebé lakole ba sira ne’ebé vulneravel liu no promotór dame, justisa no fraternidade nian entre povu sira.
Sua Santidade Amu-Papa Francisco hakotu iis iha segunda-feira dadeer, loron 21 fulan-abríl 2025, tuku 7:35 dadeer (oras Roma nian), ho tinan 88, iha Vatikanu.
Moris iha Buenos Aires, Arjentina, iha loron 17 fulan-dezembru tinan 1936, Jorge Mario Bergoglio tama iha Companhia de Jesus no dedika nia moris ba servisu pastorál, ne’ebé sai Arsebispu Buenos Aires nian iha tinan 1998 no Kardeál iha tinan 2001. Iha loron 13 fulan-marsu tinan 2013, nia eleitu nu’udar Sumu Pontífise Igreja Katólika nian, hodi adota naran Francisco, iha referénsia ba Saun Francisco de Assis, símbolu haraik-an no kompromisu nian ba ema kiak sira.
Durante nia pontifikadu, nia diferente tanba nia dedikasaun metin ba justisa sosiál no diálogu inter-relijiozu. Nia maka lian ne’ebé maka’as/firme hodi promove direitus umanus no dignidade povu sira-nian, inspira sarani milloins iha mundu tomak ho ninia mensajen domin, esperansa no solidariedade nian.
Papa Francisco vizita Timor-Leste hosi loron 9 to’o 11 fulan-setembru 2024, iha momentu istóriku ida ba ita-nia rain. Ninia vizita apostólika halibur timoroan rihun atus ba atus iha manifestasaun fiar no devosaun nian, liuliu iha selebrasaun eukarístika iha Tasi Tolu, ne’ebé partisipa hosi sarani rihun 600 resin. Durante nia estadia, nia husik hela mensajen esperansa nian, unidade no kompromisu ba dame, no subliña importánsia hosi juventude no protesaun ba valór kulturál no espirituál sira povu timoroan nian.
Ekipa: Lautem Post
