Lospalos-Servisu Munisipál Água no Saneamentu Ambientál (SMASA) servisu hamutuk ho tékniku Programa Nasionál Dezenvolvimentu Suku (PNDS) forñese bee-moos ba populasaun munisípiu Lautém atinje ona 82 pursentu.
Diretór SMASA Munisípiu Lautém, Acasio Pereira informa, objektu workshop atu fó hanoin ba tékniku PNDS hodi asegura projetu bee-moos iha área rurais sira.
“Liu husi worshop atu fo konesimentu ba tékniku PNDS hodi asegura projetu implementasaun no asegura sistema ne’ebé durante ne’e sira konstrui, maibé husik hela entaun ami haree ladún kompletu, tanba ne’e presiza fasilita hodi kompleta implementasaun,” dehan Diretór SMASA Lautém, Acasio Pereira, iha 28/09/2023.
Acasio dehan, Tuir dekretu lei númeru 4/2004 implementasaun hotu entrega ba komunidade atu jere rasik no sei hetan nafatin kontrolu husi tékniku sira.
“Depois implementasaun remata entrega ba komunidade mak jere rasik, tanba ne’e fó formasaun ba tékniku PNDS hodi asegura ninia sustentabilidade kuandu remata, bazeia ba dekretu lei númeru 4/2004, iha artigu 21 to’o 28 asegura kona-ba bee-moos ni’an, no konstrusaun ninia sustentabilidade,” nia hateten.
Nia haktuir, daudaun ne’e komunidade munisípiu Lautém asessu bee-moos atinji ona 82%.
“Parte rurál iha suku no aldeia ne’ebé fora husi postu administrativu iha kapitál munisípiu maioria asesu ona bee atinje 82% husi uma-kain rihun 15.400 asesu ona bee-moos, seidauk asesu purvolta 21%, husi uma-kain 400,” nia relata.
Iha fatin hanesan, Diretór PNDS, Alcino da Silva hatete, desde ezistensia PNDS halo konstrusaun barak hahú husi 2021 to’o 2023.
“Munisípiu Lautém hahú PNDS hamriik konstrui barak, hahú 2021 to’o 2023 ida-ne’e ita bele dehan liu 30 resin ne’ebé implementa iha suku hotu-hotu iha nivél munisípiu Lautém,” Nia informa.
Nia afirma, durante ne’e hasoru difikuldade barak iha baze, tanba komunidade laiha konxiénsia hodi tau matan ba bee-moos, tanba ne’e husu ba komunidade sira atu kuidadu utiliza bee-moos, kuidadu fasilidade sira-ne’e, hodi nune’e bele dura ba tempu naruk.
“Relasióna ho bee-moos difikuldade barak hanesan bee ho nia asesores barak ita tenki infrenta no komunidade mós dala-ruma ita entrega bee-moos lakleur aat, entaun ida-ne’e mak ami-nia difikuldade durante ne’e iha terenu.
Tanba ne’e husu ba komunidade sistema ne’ebé estabelese ona presija kuidadu, tanba sasan folin hola
karun,” Nia husu ba komunidade sira.
Reportajen: Veru Fernandez.
