Lospalos: Subsídiu ba idozus no ema ho nesesidade espesifiku ka Ema ho Difisiensia (EhD) iha munisipiu Lautém sei hahú halo ona pagamentu iha fulan oin.
Kordenador Institutu Nasional de Seguransa Social (INSS) munisipiu Lautém Anizo Freitas Marques informa, pagamentu ba idozus no ema ho difisiensia iha lautém sei hahu iha fulan oin inklui fo pagamentu faze ikus tinan kotuk nian ne’ebé seidauk fahe.
“Programa simu osan nian ne’e dala haat, faze primeiru fulan tolu too faze ikus. Maibe tinan kotuk ba faze ikus seidauk simu maibe fulan oin sei simu hamutuk ho faze ikus tinan kotuk nian.” Katak Kordenador institutu nasional de seguransa social munisipiu Lautém Anizo Freitas Marques ba Lautém-Post.
Nia dehan, dadaun ne’e ekipa husi nasional prosesa hela dadus tamba kada tinan no kada trimestre dadus kontinua aumenta no menus.
“Ita hotu hein tamba dadaun ne’e ekipa husi nasional mos esforsu hela atu aselere dadus para pagamentu hahú ona.” Nia afirma.
Tuir dadus ne’ebé parte Instutu Nasional Seguransa Social munisipiu Lautém iha, ne’e husi tinan kotuk nian tamba ne’e sei hein hela dadus tinan ne’e nian.
“Total dadus iha trimeste 3 tinan kotuk nian hamutuk 6.045 pessoas, ba dadus foun iha faze dahaat iha tinan kotuk too iha faze primeiru 2025 nian ne’ebé seidauk simu dadus. Ne’ebé sei hein hela dadus husi nasional.” Nia haktuir.
Entretantu prosesu pagamentu hanesan bain-bain tuir kada eskalaun. Husi idade 60 too 69 simu eskalun ho nia montante osan ba kada fulan 60, idade 70 too 79 ho montante osan 80 no idade 80 ba leten 100.
Reportajen : Veru
Editor : Joenaca Tupa da Conceição.
