Lospalos: Motorista sira iha munisípiu Lautem, Lamenta, durante tinan 10 resin ona maibé sei kontinua utiliza karta kondusaun provizóriu no to’o ohin loron seidauk bele hetan karta kondusaun orijinál .
Motorista Natalicio Goncalves, haktuir, sente preokupa ho karta kondusaun provizóriu ne’e.
Tanba tuir nia, kada tinan bainhira ba halo renovasaun nafatin simu de’it nia provizóriu no prejudika tebes motorista sira bainhira lori hodi halo movimentu iha tempu udan.
Tanba ne’e, nia husu ba parte servisu munisipál Diresaun Nasional Transporte Terrestre(DNTT) munisípiu Lautem, atu prodús ona karta kondusaun orijinál ba motorista sira.
“Ami komunidade Lautem husu ba parte DNTT munisípiu Lautem atu prodús ona karta kondusaun ne’ebé asli, tanba nia provizóriu prejudika ba ami atu lori iha tempu udan, tanba bele bokon no naklees.” katak nia ba Jornalista Lautem Post.
Hatan ba preokupasaun ne’e diretur servisu munisipál Diresaun Nasional Transporte Terrestre(DNTT) munisípiu Lautem, Eddy Correa dé Lemos, rekoñese, katak durante ne’e nia parte seidauk bele prodús karta kondusaun orijinál ba kliente sira tanba dadaun ne’e seidauk iha mákina emprime.
Maibé diretur ne’e afirma, katak iha ona konfirmasaun husi diresaun nasionál, katak mákina refere preparadu ona iha diresaun nasionál no prosesa ona atu iha tempu badak nia laran bele ona atu lori mai munisípiu Lautem.
“Karta kondusaun agora dadaun mákina seidauk mai, maibé, ita-nia mákina karta kondusaun nian iha ona diresaun nasionál. Hein prosesu ba Blanko nian no ha’u fiar katak bainhira prosesu sira ne’e la’o di’ak, munisípiu Lautem iha ona mákina imprime ba karta kondusaun rasik, espera katak tinan ne’e ita bele hala’o ona.” Esplika nia ba Jornalista Lautem Post.
Entretantu ba kliente sira ne’ebé dadaun ne’e sei utiliza hela karta kondusaun provizóriu iha munisípiu Lautem ne’e hamutuk ema rihun 10 resin, ne’ebé mak utiliza hahú husi tinan 2014 to’o iha tinan 2025.
Jornalista: Veru.
Editór: Joenaca Tupa da Conçeicão.
