Lospalos: Komunidade aldeia Omukanu, suku Souru, postu administrativu Lospalos, agradese ba Comunidade Cidade Amiga (CCA) Austaralia ne’ebé apoiu ona dada bee mós ba komunidade sira hafoin tinan 20 resin la asesu be mós.
Xefe suku Souru, Roberto Dias Vieira agradese ba komunidade Australianu ne’ebé ho voluntáriu apoiu ona fundus no materiál ba komunidade sira iha suku Souru, hodi nune’e ohin loron bele finaliza ona projetu bee mós no ohin loron komunidade sira bele hahú ona konsumu bee mós.
Autoridade Lokal ne’e haktuir, tanba durante ne’e tinan 20 resin ona komunidade halerik ba bee mós no durante ne’e komunidade sira la’o ain kuaze metru 600 resin hodi ba kuru bee mós iha bee posu hodi bele sustenta ba sira nia nesesidade loron loron nian.
“Agradese ba komunidade Australianu ne’ebé ajuda ona ita-nia komunidade aldeia Omukanu, tanba iha tinan barak nia laran sira nafatin halerik ba bee mós”. Dehan Xefe suku Souru, Roberto Dias Vieira ba Jornalista Lautem Post.
Nia afirma, antes ne’e komunidade sira ba kuru bee iha bee posu ne’ebé besik iha estrada boot nian, sira tenke la’o ain kuaze metru 600 resin foin bele asesu bee mós.
Tanba ne’e, lider komunitáriu ne’e husu ba komunidade Omukanu atu bele kuidadu nafatin kanalizasaun bee mós ne’e ho di’ak, ho nune’e bele kontinua fasilita nafatin komunidade sira atu bele kontinua asesu bee mós ba tempu naruk.
“Nafatin informa ba komunidade sira katak tenki kuidadu bee ne’ebé imi dada mai, se la kuida mak sei fó impaktu ba bee ne’e”, nia rekomenda.
Iha fatin hanesan administradór postu administrativu Lospalos Oldericu Coimbra mós agradese ba Comisaun Cidade Amiga(CCA) Autralia tanba bele responde ona komunidade sira nia preokupasaun, liuliu bee mós ba komunidade sira tanba durante ne’e aldeia refere difisil tebes atu asesu ba bee mós.
“Obrigadu wain ba Ekipa Comisaun Cidade Amiga ne’ebé ho inisiativa halo kooperasaun servisu ho prezidente Cidade ami Lospalos ( friemds of Lospalos) nian hodi identifika fatin ne’e hodi ajuda, tanba durante tinan barak ona ita-nia komunidade sira iha fatin ne’e la asesu bee mós ” dehan Administradór Aostu Administrativu(APA) Lospalos Oldericu Coimbra ba jornalita Lautem Post.
Autoridade Postu Lospalos ne’e mós rekomenda ba komunidade sira atu kontinua tau matan nafatin ba sustentabilidade bee mós refere atu nune’e bele nafatin utiliza ba iha tempu naruk.
Aleinde ne’e autoridade postu ne’e mós husu ba diresaun servisu munisipál agua no saneamentu (SMASA) atu kontinua responsabiliza liuliu ba manutensaun bee ninian.
“Husu ba komunidade sira atu kuidadu, labele estraga bee atu nune’e nia sustentabilidade ba oin nafatin, ohin mós rekomenda ba diretór SMASA para atu kontinua hare ba bee ne’e, tanba nu’udar autoridade iha responsavel ba oin tau matan ba nia manutensaun.” nia afirma
Iha fatin hanesan President mornington peninsula friends of Lospalos inc colleen hammond hateten, nia parte ho inisiativa apoiu komunidade sira liu atividade oin-oin hanesan fund raigen no seluk tan hodi hetan fundus hafoin lori mai Timor hodi apoiu ba komunidade sira iha Timor-Leste, espesiál ba munisípiu Lautem.
“Ami nia kustu ba suportasaun ne’e liu husi ami nia fund rigeang, no atividade sira seluk nia fundus ne’ebé ami hetan no lori hodi fó apoiu ba komunidade sira iha munisípiu Lautem lou liu Lospalos “
Entretantu bee mós ne’ebé apoiu husi Comisaun Cidade amiga ne’e fó benefísiu ba komunidade Omukanu uma-kain hamutuk 16.
Enkuantu comisaun cidade amiga apoiu fundus ba komunidade sira no sira rasik halo instalasaun iha sira nia aldeia ho durasaun fulan 6 ho totál orsamentu hamutuk $ 500.00 resin.
Jornalista: Veru.
Editór: Joenca Tupa da Conceição.
