Lospalos: Husi total projetu PDIM (Planeamentu Dezenvolvimentu Integradu Munisipal) hamutuk neen ba Munsipiu Lautém, iha tinan (2025) ne’e autoridade munisipal Lautém sei implementa deit projetu PDIM tolu, no projetu tolu kansela hodi finansia ba projetu PDIM tinan kotuk nian tamba la finaliza.
Prezidente Autoridade Munisipal (PAM) Lautém Melio de Jesus hateten, objektivu husi reuniaun Konseilu Kordenasaun Munisipal(KKM) ne’e atu koalia kona-ba implementasaun orsamentu 2025 nian hodi halo alokasaun orsamentu ba projetu PDIM iha tinan(2025) ne’e.
Tuir nia implementasaun projetu PDIM nian ba tinan ne’e hamutuk neen, maibe sei implementa tolu deit no tolu seluk kansela hodi finansia ba projetu PDIM ne’ebé antes ne’e atu finaliza tuir termu kontratu ne’ebe iha maibe la hotu.
“Projetu PDIM ne’ebé financia husi Orsamentu Geral do Estadu (OGE) 2025, tamba ita iha negativu ba OGE 2024 liu-liu ba projetu 16, ba prog=jetu 6 la konsege finaliza.” Dehan nia ba Jornalista Lautém-Post, hafoin prezide Reuniaun Konsellu Kordenasaun Munisipál (KKM) Lautém, Tersa(04/02).
Autoridade Maximu iha Lautém ne’e haktuir, husi total projetu PDIM hamtuk 16 iha tinan fiskal 2024 nian, iha total projetu PDIM hamutuk neen ne’ebé la konsege finaliza autoridade Lautém re-apropria fila-fali ba orsamentu tinan 2025 nian, atu nune’e labele prejudika ba orsamentu tinan 2026 nian.
“Ita re-apropria fila fali iha 2025. Tamba ne’e ita hetan negativu porvolta de $ 247 mil, nune’e liu-husi aprovasaun KKM para labele prejudika orsamentu 2026 nian. Entaun iha PDIM nian husi 6 ne’e ita ho justifikasaun kanseladu hodi finansia ba projetu negativu ne’ebé iha 2024 ninian. La signifika ita kanseladu maibe sei sai prioridade ba 2026.” Nia afirma.
Ba progetu ne’ebé hetan alterasaun iha tinan ne’e mak hanesan fatin lisu iha Lautém no Lospalos, fatin fini agricultura no irigasaun iha Vairoma postu Luro nian no progetu refere sei tau iha tinan 2026.
“Progetu ne’ebé ita altera mak fatin lisu iha postu Lautém no Lospalos vila, fatin tau fini agricultura nian no irigasaun iha Vairoma postu Luro, tamba ne’e liu-husu reuniaun hodi deside katak projetu ne’e ita kansela hodi finansia negativu nian maibe ita sei tau ba iha 2026 nian. Depois de konstrusan estrada ne’e lao.” Nia informa.
Enkuantu ba projetu ne’ebé mak sei implementa iha tinan ne’e mak hanesan sala emergensia iha Mehara, bee mos iha Vaniria suku Eukise, postu Lautém no konstrusaun moru sanitariu.
“Projetu tolu ne’ebe sei implementa mak sala emergensia iha centru saude Mehara, bee mos iha aldeia vaniria suku Eukise, postu Lautém no mos konstrusaun moru sanitariu Walu, lima iha postu Lospalos vila.” PAM Lautém ne’e haklaken.
Total alokasaun orsamentu ba PDIM 2025 nian ne’e hamutuk $ 500 mil, kansela $ 247 mil hodi finansia ba projetu DNTT, konstrusaun eskola rua EBC Leusari, Uma-Adat(Le-Jiaval) Lospalos, uma antiga iha Caivaca. Edifisu STAE. No 5 % ba sistema bee mos iha Ailarinu.
Enkuantu orsamentu ho total $ 253 mil ital refere mak sei implementa ba projetu tinan ne’e nian. No servisu munisipal liu-husi PDIM sei aprezenta iha dia 15 Febreiru agora.
Reportagen: Veru.
Editor: Joenaca Tupa da Conceição.
