LOSPALOS: Estadu Timor-Leste kondekora veterano Lautém oan 178 ho medalla ordém Nicolau Lobato iha âmbitu aniversáriu proklamasaun independensia RDTL Ba dala 48 iha Lautém.
Ministro Petroleo Rekursu Minerais Francisco da Costa Monteiro, hateten, prosesu luta libertasaun nasional ne’e liu husi eroi sira nia sakrifísiu, tanba ne’e estadu iha devér atu rekoñesen
“Estadu Timor-Leste fó rekoñesimentu no ónra ba luta na’in sira nia dedikasaun durante luta libertasaun nasional”, dehan governante liu husi diskursu.
Maijor Jenerál F-FDTL, João Miranda Aluc Descartes, hateten, prosesu kondekorasaun ba veteranus seidauk konklui tanban estado seidauk kondekora eroi hotu.
“Prosesu kondekorasaun ba veteranus sira ne’e seidauk konklui tamba estadu tenke verifika halo didiak”, dehan nia, liu husi nia deskursu.
Aluc Descartes argumenta, kondekorasaun ne’ebé simu ona husi estadu, hanesan simu responsabilidade atu kontribui dezenvolvimentu.
“Kondekorasaun sira nebe simu ona nee hanesan mos simu tan responsabilidade ida hodi kontribui ba dezenvolvimentu rai ida ne’e”, dehan nia.
Kondekoradu, Frazelinho Trinorio Sai Costa Rico, agradese ba estado Timor-Leste tamba fo ona kondekorasaun ba sira.
“Iha tempu rezistensia nia laran ami la iha hanoin atu simu kondekorasaun ou simu osan maibé ami hola parte iha funu para atu liberta ita nia rain, maibe too ukun rasik aan estado fo kondekorasaun ne’e ami agradese “, dehan nia.
Entretanto serimonia kondekorasaun realiza iha iha kampu 28 de novembru municipiu Lautem.
Enkuantu kondekoradu sira ne’ebé simu ona kondekorasaun husi estado Timor Leste hamutuk na’in 178, maioria Grau 3 kompostu husi postu administrativu 5.
Reportagen:Veru Fernandez.
Editor : Black Angel
