Lospalos: Xefe suku Kampung Alor-Dili, Alcina Carvalho, deklara, feto potensiál prontu lidera no sai inan ba ema hotu bainhira povu fó fiar iha eleisaun suku ne’ebe sei akontese iha loron 28 fulan Outubru 2023.
Lider komunitária ne’e enkoraja feto Lautém atu husu matak malirin ba lian na’in kultura hodi hetan matak malirin tanba munisipiu Lautém sei adota sistema patrilineal ka mane mak iha direitu (tuir kultura hodi ukun suku ida) .
Tanba ne’e, Alcina argumenta, feto Lautém presiza hakbesik an ba lian na’in no uma mane sira hodi hetan matak malirin, nune’e bele lidera iha suku.
“Haraik an la’ós atu lakon dignidade maibé, koko atu husu lia na’in no avó iha kultura hodi bele tula liman (matak malirin), ba ita nia kabas atu hakat ba iha eleisaun”, dehan nia hafoin partisipa formasaun ba feto potensiál iha munisípiu Lautém, Kuarta, (05/10/).
Lideransa ne’ebé di’ak, mak ho espíritu voluntarizmu hodi garante armonia iha suku laran.
Iha fatin hanesan, kandidato feto husi suku Pairara, Vitalinha dos Santos, argumenta, nia deside kandidata an hodi kompete iha eleisaun suku tanba hetan inspirasaun husi munisipiu seluk.
“Motiva ha’u atu kandidata an ba xefe suku ne’e, tanba uluk ha’u tama sai munisípiu seluk too suku, hare ema nia dezenvolvimentu ba oin maka’as liu, kompara ho ha’u nia suku (Pairara)”, nia esklarese.
Kandidatu ne’e esklarese, nia kompete iha eleisaun suku la’ós atu sai liurai iha suku Pairara maibé atu lidera prosesu administrasaun.
“Nasaun ne’e tuir demokrasia nia lala’ok, kultura ita la’o tuir kultura, ha’u hanesan xefe suku ha’u lidera suku la’ós mai ukun , la’ós atu sai liurai. ha’u mai atu lidera suku hodi dezenvolve suku, la’ós atu sai liura”, nia dehan.
Nia husu ba feto potensiál iha postu Lautém, tenke partisipa dezenvolvimentu nasaun nian liu-liu hahú husi suku.
Reportajen : Veru Fernandes
Editor : Black Angel
