LOSPALOS: Ministru Pretroleu no Minerál (MPM), Francisco da Costa Monteiro, ne’ebé prezide serimónia posse ba Xefe Suku eleitu no membru konsellu suku na’in-161 iha munisípiu Lautém, husu atu serbí populasaun ho justu, inkluzivu no prósperu durante mandatu 2023 to’o 2030.
Serimónia posse ne’e realiza iha ámbitu komemorasaun loron aniversáriu Proklamasaun Unilaterál Independénsia ba dala-48 (28 Novembru 1975 -28 Novembru 2023), iha resintu administrasaun Munisípiu Lautém.
Ministru Francisco Monteiro dezafia xefe suku eleitu sira ho membru konsellu suku, xefe aldeia, delegadu no delegada sira, iha munisípiu Lautem atu hatudu kompromísu ida ne’ebé hatuur hikas prinsípiu hirak fundamentál, ne’ebé sai hanesan rin bá Timor-Leste nia rejíme demokrátiku no ba objetivu hirak ne’ebé mak estratéjiku hodi promove dezenvolvimentu nasionál.
“Husu ba lider komunitáriu sira atu lidera hodi hala’o kna’ar esensial hodi harii sosiedade ne’ebé justu no inkluzivu prósperu tanba imi nia kompromísu la’ós de’it atu ka’er kna’ar ne’ebé imi simu, maibé tanba misaun lulik ida, atu serbí no hatudu dalan ba ema hirak ne’ebé pertense bá imi nia komunidade lokál,” Governante ne’e akresenta.
Nia fó hanoin katak, lider komunitáriu sira maka hala’o funsaun hanesan intermediáriu, ne’ebé esensiál entre saida mak ninia komunidade hakarak atu hetan, no saida mak instituisaun sira iha Governu atu hala’o.
“Bainhira imi fasilita diálogu, hato’o nesesidade hirak hosi komunidade no promove partisipasaun sívika, iha ámbitu kada komunidade lokál nian, maka imi haforte ona aliserse hirak bá harii ita nia demokrásia,” nia afirma.
Tanba partisipasaun ativa hosi sidadaun sira maka sai forsa ne’ebé dudu ba oin sosiedade ne’ebé prósperu.
Bainhira lideransa komunitáriu kria oportunidade sira hodi involve membru hotu iha sira nia komunidade, maka sira bele hametin ona, la’ós de’it lejitimidade iha desizaun hirak ne’ebé foti, maibé mós sira hafutu metin liután sira-nia aan bá komunidade.
Ministru ne’e, konvida empossadu sira atu hateke ba futuru ho laran ida nakonu ho optimizmu, hodi tau iha ulun katak, kada dezafiu ne’ebé sira hasoru no hakat liu ona, sei halo sira sai forte liután no tuba rai-metin liután.
Biban ne’e, Governante ne’e mós lori Governu nia naran agradese ba kompromísiu ne’ebé ohin emposadu sira hasán. Atu sira nia lideransa bele hakat tuir dalan integridade, responsabilidade, justu no dedikasaun ba nasaun Timor-Leste.
“Komprimisiu no ondra jura ba maromak no povu katak ami sei kompre no responsabilidade ne’ebé ami simu hodi servi povu no halo dezenvolvimentu iha ami nia suku no aldeia, ne’e tenke tane hodi halo tuir”, nia fó hanoin.
Iha biban hanesan, Administradór MunisÍpiu Lautem, Domingos Savio husu ba Xefe Suku no membru Konsellu suku tomak atu toma responsabilidade hodi serbí populasaun.
“Husu ba Xefe suku no membru konsellu suku sira katak responsabilidade ne’ebé imi simu ne’e la’ós oportunidade maibé ne’e sai responsabilidade ida atu serbí komunidade iha baze”, nia sujere.
Membru konsellu suku ne’ebé simu ona tomada de posse na’in-161 kompostu husi feto 54 no mane 107 husi suku 8 iha postu administrativu Lospalos, Munisipiu Lautém.
Reortagen: Veru Fernandez
Editór : Helefatil
