Lospalos: Diresaun Nasional Gestaun Risku Dezastre (DNGRD) liu husi Autoridade Protesaun Civil Munisipiu Lautém (APC Sigla portugues ) apoiu ona material konstrusaun ba vitima dezastre hamutuk 111 iha munisipiu Lautém, kompostu husi estragos total 15, estragos nato’on 33, no estragos kaman 63.
Hafoin distribui material konstrusaun ne’e ba vitima dezastre sira, diretur nasional DNGRD Francisco Fatima Da Cruz husu ba benefisiariu sira ne’ebe mak hetan ona material konstrusaun nian atu bele hari fila fali hari uma dok husi fatin risku dezastre nian, nune’e bele evita an husi risku dezastre naturais sira.
“Fo hanoin katak material ne’ebe simu, lori ba tenki halo uma iha fatin ne’ebe mak labele iha risku ba dezastre. Halo iha fatin ne’ebe pertense ba imi nian, labele halo fali iha ema seluk nia rai .” Dehan Francisco hafoin istribui material konstrusaun ba vitima dezastre sira.
Iha sorin seluk reprezentante PAM Munisipiu Lautém,Jose Da Conceição hateten, programa ne’ebe governu halo ne’e parte ida husi libertasaun povu. Tamba ne’e nia husu ba lider komunitariu sira atu bele tau matan ba vitima sira ne’ebe simu ona material komstrusaun nian ho nune’e bele hari sila fali sira nia uma iha fatin ne’ebe seguru.
“programa governu nian ne’e faz parte ba iha libertasaun do povu, tamba ne’e husu benefisiariu sira tenki kuidadu an iha fatin hotu hotu atu labele hetan tan terus ida ne’e. Dala ida tan wainhira hari uma karik hare fatin didiak mak hari para depois labele hetan tan problema”. Katak reprezentante PAM ne’e.
Alen de ne’e nia mos husu ba administrador postu, inklui sefe suku no sefe aldeia sira atu kontrola didiak inan aman sira ne’ebe hetan ona material konstrusaun nian atu bele hari fila fali uma iha fatin ne’ebe seguru.
Iha fatin hanesan habitante husi postu Iliomar, suku Fuat, aldeia Rumutau Anacleto De Carvalho sente kontente no agradese ba Estado tamba apoiu ona material konatrusaun ba sira atu bele hari fila fali uma ne’ebe mak hetan ona estragus ne’e.
“Ami sente kontente tamba hetan ona material konstrusaun nian husi Estado. No ami tenki lori ba ami nia fatin no ami sei halo ami nia uma. Atu to’o ka lato’o mos ami kontente tamba hetan ona material konstrusaun nian no ami sei buka meius oinsa para halo lalais uma ne’e,” nia Afirma.
Vitima dezastre ne’e hatutan tan, Estado fo ona ajuda no ami laos atu ba fa’an fila fali mais ami tenki halo fali ami nia uma atu nune’e ami nia familia bele hela. No ohin koalia tiha ona katak halo labele iha fatin ne’ebe risku atu nune’e ami labele hetan tan dezastre.
Entretanto vitima ne’ebe nia uma hetan estragos total simu material konstrusaun uma nian mak hanesan kaleng 50, simenti Zumbo 1, besi baza 50, besi beton 60, prafuzu box 2, Martelu 1, kanoru boot 1, no kanoru kiik 2, no kawat arame 2, inklui osan dolar rihun ida ($ 1000.00).
Ba kategoria hetan estragos nato’on hetan besi baza 50, kaleng 50, Prafuzu box 2, martelu 1, metru sukat rai 1 no osan atus hitu lima nolu ($750.00).
No ba estragos kaman simu kalen 50, prafuzo box 2 metru 1, sukat rai 1, martelu 1, no osan atus ne’en ($600) dolar americanu.
Reportagen: Veru Fernandes.
Editor: joenaca Tupa da Conceição.
