LOSPALOS: Udan-boot ne’ebé akontese kuaze oras ida-resin iha Munisípiu Lautém provoka komunidade uma-kain 12 iha Aldeia Savarika, Suku Fuiloro, Postu Administrativu Lospalos, sofre inundasaun.
Dezastre naturál ne’ebé akontese iha Kinta Feira (04/07), tuku 5:00 matrugada ne’e, bee konsege lori sasán uma laran, animál sira hanesan fahi tanba korrente bee mota iha Savarika sa’e maka’as.
Família afetadu inundasaun iha Aldeia Savarika, Suku Fuiloro, Raimundo Alves, informa udan-boot provoka korente mota iha ponte Savarika sa’e maka’as, nune’e tama ba komunidade sira nia uma hodi lori sasán uma-laran no lori mate animál hanesan fahi balun.
“Udan-boot provaka bee mota sa’e to’o tama ami nia uma-laran hodi lori sasan balun no animál sira balun mate,” dehan komunidade afetadu ne’e ho triste.
Kada tinan udan-monu rai, nia dehan sira sempre hetan ameansa husi korente mota ne’e, tanba tempu okupasaun nia laran iha drainajen, maibé daudaun hetan estragu ne’ebé bainhira udan-boot bee nakonu iha draijane hodi suli liuhusi estrada mak tam aba komunidade nia uma.
Ho inundasaun ne’e, Komunidade ne’e husu ba Governu liuhusi Ministériu Obra Públiku (MOP) atu halo reabilitasaun ba drainajen iha aldeia Savarika.
La rejista vítima mortál
Hafoin inundasaun, Komandante Autoridade Protesaun Sivíl (APC), Munisípiu Lauté, Inspetór Xefe Polísia, Tito Da Silva hamutuk ho nia ekipa sira tu’un direta foti dadus ba vítima inundasaun.
“Dadus ne’ebé ami konsege rekolla mak komunidade afetadu inundasaun iha Savarika nian ne’e hamutuk uma-kain 12, maka be’e tama sira nia uma hodi hamate animál hanesan manu, asu inklui fahi mate no sasan uma-laran mota konsege lori balun, enkuantu ba vitima sira ho kondisaun d’ak ka laiha vítima mortal”, Komandante ne’e relata.
Komandante ne’e afirma bainhira foti hotu ona dadus vitima sira nian, hafoin apoia sasán emerjénsia hanesan ai-han no la’ós ai-han ba vitima sira.
“Familia afetadu ne’ebé afeta ba korrente mota nia dadus ami foti hotu ona no ami sei apoiu sasán emerjénsia ba sira hanesan foos, biskuat, susu-Enak, dancow, basia, balde, no sasan seluk dapur nian”, Komandante ne’e afirma.
Reportajen: Veru
Editór: Helefatil
