Lospalos: Grupu agrikultór iha munisipiu Lautém kestiona Ministru Agrikultura, Peska, Pekuaria no Floresta, tanba fahe hand tractor ne’ebé la iha forsa ba agrikultór sira. Maibe, ministru Agrikultura, Peska, Pekuaria no Floresta, husu to’os-nai’in sira uza, hafoin avalia.
Xefe grupu agrikultura, Canlaran Iliomar , Ermenegildo Carvalho, krítika ministru agrikultura, peska, pekuaria no floresta tanba fahe tractor marka Firman ho nia kapasidade 600, la iha forsa atu dezenvolve natar.
“Hand tractor ida ami simu ne’e la iha forsa, hand tractor marka Quick ho nia kapasiade 1.000 mak di’ak, tanba ami nia natar iha Irabere, tahu naruk, agora hand tractor badak hanesan ne’e tama ba natar, bee bele tama ba mákina laran. Tractor ki’ik ne’e ba iha foho no rai maran bele, maibé ita tau iha natar irabere Labele! tamba nia kondisaun ne’e badak liu, depois mákina nia forsa ne’e 7,5 de’it,” to’os na’in lamenta no kompara mákina ida ba mákina seluk.
Ministru Agrikultura Peskas, Pekuaria no Floresta, Marco da Cruz, defende, tractor ne’ebé governu sosa, iha kualidade dia’k tanba forsa no kmaan kompara ho tractor tuan ho marka Quick.
“Hand tractor ne’e di’ak atu tama ba natar tanba ladun todan, ida uluk ne’e todan liu, bainhira halo movimentu iha kabubu laran susar. Ita buka ida konfortavel liu, ita iha natar barak mak kabubu ki’ik, tractor ida ne’e di’ak. Uza mós gazolina, ne’e duni sira bele asesu. Bainhira uza sira bele sente katak ida agora nee di’ak tamba ladun todan, bele uja iha toos no natar hotu,” governante defende.
Governu fahe tractor unidade 25, kompostu husi tractor médio unidade 3, mákina baku háre unidade 3, mákina behu batar 3.
Reportagen: Veru
Editor : B.A
