Lospalos: Hafoin simu vizita husi ekipa parseria Comisaun Cidade Amaiga(CCA) Autralia, hodi observa programa Edukasaun Multi Lingua (EMuLi) ne’ebé implementa iha Pre Eskolar Futuru Muapitin.
koordenadóra Pre Eskolár futuru Muapitine, Anina Marques husu ba parseria ekipa CCA Austalia atu apoiu harii moru protesaun ba Pre eskolár futuru Muapitine inklui harii mós fatin merenda eskolár nian ba estudante sira.
“Husu ba ekipa CCA Autralia atu kontinua fó apoiu ba Pre Eskola Futuru Muapitin, liuliu konstrui moru ba eskola nian inklui fatin merenda eskolár, tanba dadaun ne’e Pre Eskola Futuru Muapitin laiha fatin ba merenda eskolár”, Katak Cordenadora Pre Eskolar Futuru Muapitin Anina Marques ba jornalista Lautem Post ,hafoin Simu vizita husi ekipa parseria CCA Autralia.
Aleinde ne’e, koordenadóra ne’e mós sente kontente no agradese ba prezensa husi ekipa CCA Australia ne’ebé mak hala’o ona vizita ba sira nia eskola hodi hare direita ba programa EMuLi ne’ebé mak durante ne’e implementa ona iha sira nia Eskola.
“Ami kontente tebes ba sira nia vizita, bele mai hare ami nia eskola no liuliu sala ba estudante sira nian. Ami mós hato’o atu ajuda ami halo lutu no dapur hahán nian para labarik sira bele tur ho di’ak hodi han”. Nia afirma.
Hatán ba rekomendasaun ne’e secondary teacher and mornington peninsula, Patrick Bnyon, hateten, nia parte sei kontinua esforsu hodi buka meius atu bele responde ba rekomendasaun hirak ne’ebé mak parte eskola relata, nune’e bele hametin nafatin relasaun servisu entre eskola ho Cidade Amiga.
Manorin na’in husi Australia ne’e mós elogia tebes ho ambiente Pre Eskolar Futuru Muapitine nian, liuliu sala dé aula ne’ebé inspira tebes vontade estudante sira nian atu tuir prosesu aprendizajen.
“Ami mós buka hela apoiu atu nune’e kontinua suporta ita boot sira nia preokupasaun, Obrigadu barak ba imi-nia tempu bele simu ona ami, no ha’u nu’udar profesór ida iha Australia kontente tebes bele hare eskola ne’e“. Nia kompromete..
Tanba ne’e, nia hatutan, iha tipu materiál oin-oin oinsá hanorin estudante sira liuliu iha sala laran ne’ebé nakonu ho kores oin-oin atu bele ajuda tebes ita-nia oan sira atu aprende.
Entretantu iha diskusaun ne’e mós parte CCA mós husu ba koordenadóra Pre eskolár atu halo proposta hodi submete ba parte ekipa mornington peninsula destakadu Lospalos (freinds of lospalos), nune’e sira bele kontinua relata ba comisaun cidade amiga iha Australia.
Molok ne’e iha tinan kotuk Pre Eskolar Futuru Muapitine hetan ona apoiu husi comisaun cidade amiga iha programa EMuLi liuliu apoiu materiál halimar nian ba labarik sira, inklui mós fatin halimar ba estudante sira.
Jornalista: Veru.
Editór: Joenaca Tupa da Conceição.
