Lospalos: Hafoin hetan graduasaun husi sentru formasaun Pendidikan Ketrampilan Putri PKP fundasaun Seraphine ADM Lospalos, graduadu feto foinsae Juvencia Madalena Marques ho esperansa sei loke rasik negosia oinsa transforma aifarina ba dose bola salju hodi faan iha merkadu Munisipiu Lautém.
Juvencia hatete, wainhira sai husi kolejiu Madre ADM nia iha ona vizaun antes hetan graduasaun katak sei halo negosiu liu husi transforma aifarina ba dose bola salju hodi ba faan iha merkadu.
Nia dehan iha ona hanoin ne’e tanba haré ba munisipiu Lautém ne’ebé mak iha potensia ba produsaun aifarina.
“Hau hakarak halo negisiu ki’ik hodi aumenta hau nia esperensia, negosiu ne’ebé mak hau atu halo mak halo dosi bola salju hodi sustenta hau nia familia. Tamba iha ne’e aifarina mos barak hodi halo, wainhira halo hau sei fa’an haleu deit.” Dehan nia hafoin sai mellor graduadu iha sentru formasaun Pendidikan Ketrampilan Putri PKP fundasaun Seraphine ADM Lospalos.
Nia hateten, liu husi esperensia ne’ebe nia hetan iha benefisiu bo’ot tebes, tamba ne’e nia dezafia feto foinsae sira atu bele aprende mos iha fundasaun Seraphine.
“Hau nia mensagen ba feto foinsae sira katak mai hamutuk iha fatin formasaun serapinhe tamba iha ne’e ita aprende buat barak no bele aumenta ita nia kapasidade no mentalidade atu kompete iha liur.” nia apela.
Iha fatin hanesan diretora fundasaun seraphine madre Chrisensia ADM Lospalos mos enkoraza graduadu sira katak depois de hetan gradusaun tenki kontinu nafatin saida mak sira aprende ona iha komunidade nia leet.
“Ami nia hakarak depois sira kursu fila uma laos tur deit maibe tenki halo serbisu ne’ebé mak iha. Buat ne’ebé estuda iha ne’e tenki aplika iha sira nia moris, liu-liu konaba tein no suku ropa sira bele halo.” dehan madre Chrisensia ADM.
Alende ne’e reprezentante doador husi Miserior Dialogue Partreship Service Timor-Leste Inge Ruth Lempe mos husu ba graduadu sira atu kontinua luta ho esperensia ne’ebé sira iha hodi bele ba kompete iha kampu de trabalhu.
” Imi hotu hakaas aan atu dezenvolve imi nia kapasidade hodi bele la’o ba oin no buka serbisu iha industria refere, karik iha ideia bele hari emprego ba aan rasik,” Katak nia.
Iha sorin seluk diretora SEFOPE Lautém Catarina Dos Santos afirma governu liu husi SEFOPE iha nia politika katak kada tinan sei apoiu fundus ba grupu sira ne’ebé presija, liu-liu ba graduadu sira ne’ebé sai husi centru formasaun sira no iha inisiativa atu halo negosiu rasik.
” Liga ho formasaun SEFOPE iha nia politika rasik katak wainhira alin sira hetan ona gradusan iha centru formasaun iha mos oportunidade atu asesu ba fundos husi governu liu husi SEFOPE prepara ba sira.” dehan Diretora SEFOPE Lautém ne’e.
Nia hatutan atu asesu ba fundo refere tenki prense rekezitus ne’ebé mak governu prepara ona nune bele garante katak grupu refete labele lakon ka paradu.
“Kriteria tenki halo grupu membru minimu ema nain 3 no maximo nain 5, presija registu serve, iha konta bankaria grupu, iha mapamentu. Aktividade ne’ebé halo tenke lao ona durante fulan 3 ka 6, karik kbiit la too halo proposta ba SEFOPE.” Nia esplika.
Diretora ne’e hatete, Antes hetan apoiu sei iha assementu husi SEFOPE hafoin bele apoiu. tuir nia montante orsamentu ba apoiu grupun nian maka mimimu dolar amerikanu rihun 2, no masimu rihun 20.
Entretantu sentru formasaun Pendidikan Ketrampilan Putri PKP fundasaun Seraphine ADM Lospalos hahu inisia iha loron 06- fulan janeiru tinan 2006 ne’ebe mak simu deit estudante nain 20 kada tinan.
Ba estudante ne’ebe hetan ona gradusaun hahu husi inisiu too ohin loron iha ema hamutuk atus 3 resin. No husi numeru ne’e formado sira ne’ebe susesu ona iha kampu de trabalhu atingi ona 50 %.
Enkuanto ba graduado ne’ebe simu graduasaun iha tinan ne’e hamutuk ema nain 19.
Reportajen: Veru.
Editor: Joenaca Tupa da Conceição.
