Lospalos: Professor kontratadu no Voluntariu sira iha Munisipiu Lautém husu Ministeriu Edukasaun(ME), atu tetu didiak desizaun ne’ebe ministeriu foti liu husi sirkular ne’ebe fo hasai hodi hapara Professor kontratado no Voluntariu sira, tanba estudante sira maka sai vitima ba desijaun ne’e.
Edukasaun nu’udar pilar importante ida, wainhira atu sai ema ne’ebe matene tenki liu husi edukasaun atu bele forma ema sai matenek ho nune’e atu garante kualidade edukasaun ne’ebe diak presija iha manorin nain sira.
Liga ho desizaun Ministeiru Edukasaun nian Professor kontratadu no Voluntariu sira sente la satisfas, tanba konsidera impaktu husi desizaun ne’e sei prejudika ba estudante sira ne’ebe mak inosente maibe sei sai alvu ne’ebe sofre impaktu husi desizaun ne’e, tamba professores la to’o atu hanorin no aula balun laiha ona materia.
“La satisfas ho desizaun ministerio edukasaun nian tamba ita nia estudante sira mak sai vitima, wainhira hapara ami nia kontrato konserteja prosesu aprendizajen mos la lao tamba iha nee menus profesores.” Dehan Oracio da Cruz Professor Kontratadu husi Ensinu Baziku central No.3 Lulira, Lospalos.
Nia hatutan Edukasaun ne’e pilar ida importante tebes, tamba liu husi edukasaun mak hanorin ema atu sai matenek no mos wanhira atu garante kualidade husi edukasaun presija mos iha professor para atu hanorin estudante sira.
Iha fatin seluk Directur Enssino Secundariu Geral Lere Anan Timur Lospalos, Celestino Soares hateten dadaun ne’e problema ne’ebe Eskola Lere infrenta maka menus professores. Tamba ministerio hapara ona profesores kontratado no kazuais hamutuk nain 15 husi Ekola Lere Anan Timur.
Nia komfesa, dadaun ne’e professor permanente ne’ebe mak hanorin iha eskola Lere Anan Timur hamutuk nain 19. Númeru ne’e komspostu husi director eskola, adjunto diretor hodi atende estudante sira hamutuk 800 resin.
“Problema ne’ebe agora ami enfrenta ne’e mak menus profesores, Tamba hapara ona profesor kontratadu no kazuais sira. Profesor permanente mos iha deit 19 kompostu husi director eskola adjuntu director no estudante atus valu resin.” Nia esplika.
Situasaun hanesan akontese mos iha Ensinu Sekundariu Geral Nino Conissantana Lospalos, dadauk ne’e aula ensinu nian seidauk lao normal tanba Professor la to’o atu hanorin.
Director Ensino Secundariu Geral Nino Conissanta Lospalos Grilo Fernandes haktuir, despaixu husi Ministeiru ne’e halo estudante sira sai vitima tamba profesore la to’o no prosesu aprendizajen labele lao normal.
“Despaixu ne’ebe husi ministerio hatun ne’e estudante sira mak sai vitima tamba profesores la to’o no prosesu aprendizajen la lao tamba menus profesor.” Katak Grilo.
Entretanto dadaun ne’e total profesores kontratadu iha munisipiu Lautem hamutuk nain 213, husi númeru ne’e nain 193 mak hetan ona ingresu, enkuanto nain 20 ministeriu hapara ona kontratu. Inklui Professor volontariu nain 68 ne’ebe mak Ministeiru hapara bazea ba sirkular ne’ebe Ministeiru Edukasaun fo sai.
Reportagen: Nandez Veru.
Editor: Joenaca Tupa da Conceição.
